ನಾ ಕಂಡಂತೆ ಇಲ್ಲಿ ಯಾರು ಒಳ್ಳೆಯವರಲ್ಲ

 ನಾ ಕಂಡಂತೆ ಇಲ್ಲಿ ಯಾರು ಒಳ್ಳೆಯವರಲ್ಲ,

ಉಳಿದವರ ಕಂಡಂತೆ ನಾನು ಒಳ್ಳೆಯವನಲ್ಲ.

ನನ್ನ ನಗುವಿನ ಹಿಂದೆ ಎಷ್ಟು ಕಣ್ಣೀರು ಇದೆ,
ಅದನ್ನು ಕೇಳುವ ಮನಸ್ಸು ಯಾರಲ್ಲೂ ಇಲ್ಲ.

ನಂಬಿಕೆ ಇಟ್ಟ ಹೃದಯವೇ ಒಡೆದುಹೋಯಿತು,
ಮಾತಿನಲ್ಲಿ ಕೊಟ್ಟ ವಾಗ್ದಾನ ಗಾಳಿಯಲ್ಲಿ ಹಾರಿತು.

ನನ್ನ ಮೌನವನ್ನು ತಪ್ಪು ಎಂದು ತೀರ್ಪು ಕೊಟ್ಟರು,
ನನ್ನ ನೋವನ್ನು ಯಾರೂ ಕಥೆ ಎಂದೂ ಕೇಳಲಿಲ್ಲ.

ಈ ಜಗದಲ್ಲಿ ನಿಜವಾದ ಮನಸ್ಸು ಹುಡುಕಿದಾಗ,
ಮುಖವಾಡಗಳ ನಡುವೆ ನಾನು ಒಂಟಿಯಾಗಿಬಿಟ್ಟೆ.

ಆದರೂ ನನ್ನ ಹಾದಿಯಲ್ಲಿ ನಾನು ನಡೆಯುತ್ತೇನೆ,
ಕಣ್ಣೀರು ಒಳಗಿಟ್ಟುಕೊಂಡೇ ನಗುತ್ತೇನೆ.

ಯಾಕೆಂದರೆ ಈ ಲೋಕಕ್ಕೆ ಸತ್ಯ ಬೇಕಾಗಿಲ್ಲ,
ಒಬ್ಬರನ್ನೊಬ್ಬರು ತಪ್ಪು ಎಂದು ಹೇಳುವ ಕಥೆಯೇ ಬೇಕು.

 

✍️

ಪುಂಗಿ ದಾಸನ ಲುಂಗಿ ಕಥೆ

ಅಲ್ಲೊಬ್ಬ ಪುಂಗಿ ದಾಸನಿಗೆ ತಾನು ಊದುವ ಕೊನೆಯ ಪುಂಗಿಯ ಮುನ್ನ 

ತಾನು ಊದುವ ಪುಂಗಿಯ ಸ್ವರ ಜನರ ಹೃದಯದಲ್ಲಿ 

ಇರುವ ಹಾಗೆ ಊದಬೇಕು ಎಂದು ಯೋಚಿಸಿದ.

ಆದರೆ ಸಮಸ್ಯೆ ಏನು ಅಂದರೆ  ಪುಂಗಿಯ ಸ್ವರ ಗೊತ್ತಿರುವವರ ಮುಂದೆ ಊದಿದರೆ ಮಾತ್ರ ಅವರ ಮನದಲ್ಲಿ ಹಾಗೆಯೇ ಉಳಿಯುತ್ತದೆ ಹಾಗು ಪುಂಗಿ ಊದುವವನಿಗೂ ಪುಂಗಿಗೂ ಬೆಲೆ ಇರುತ್ತದೆ. 

ಇದರ ನಡುವೆ ಒಮ್ಮೆ ಊರ ಜಾತ್ರೆಯಲ್ಲಿ ಅವನು ಪುಂಗಿ ಊದುವ ಸಮಯದಲ್ಲಿ ಲುಂಗಿ ಗಾಳಿಯೊಂದಿಗೆ ಹಾರಿ ಹೋಗುತ್ತದೆ. 
ಆದರೂ ಕೂಡ ಅವನು ಪುಂಗಿ ಊದುವುದನ್ನೂ ನಿಲ್ಲಿಸಲಿಲ್ಲ. 
“ಲುಂಗಿ ಹೋದ್ರು ಪರವಾಗಿಲ್ಲ,  ಪುಂಗಿ ಸ್ವರ ಮಾತ್ರ ಉಳಿಬೇಕು !” ಅಂದಿದ್ದ.

ಕೊನೆಗೆ ಅವನಿಗೆ 
“ಲುಂಗಿ ಹಾರಿದ ಪುಂಗಿ ದಾಸ, ಎಂದು ಹೆಸರು ಬಂತು . ಆದರೆ ಅವನ ಪುಂಗಿಯ ಸ್ವರ ಮಾತ್ರ ಜನರ ಮನಸಲ್ಲಿ ಅಜರಾಮರವಾಗಲಿಲ್ಲ.

ಜನರ ಮುಂದೆ ಎಸ್ಟೆ ಪುಂಗಿ ಊದಿದರು , ಪುಂಗಿಯ ನಾದಕ್ಕೆ ತಲೆದೂಗಿದರೆ ಹೊರತು ಪುಂಗಿಯ ಸ್ವರವನ್ನು ಅರ್ಥಹಿಸದೆ ಹೋದರು. 

ಆದರೂ ಕೂಡ ಅವನು ಪುಂಗಿ ಊದುವುದನ್ಮು ಮಾತ್ರ ನಿಲ್ಲಿಸಲಿಲ್ಲ ಹೀಗೆ ಅವನ ಕೊನೆಯ ಪುಂಗಿ ಊದುವದಿನ ಅವನು ನಕ್ಕು ಹೇಳಿದ .😁

ನನ್ನ ಉಸಿರಿನಲ್ಲಿ ಊದುವ ಪುಂಗಿ ನಿಲ್ಲಬಹುದು ಆದರೆ ಸ್ವರ ಬೇರೆಯವರ ಉಸಿರಲ್ಲಿ ಮುಂದುವರೆಯುತ್ತದೆ ..

ಇಲ್ಲಿ ಅರ್ಥವಾಗದ ವಿಷಯವನ್ನು ಎಷ್ಟು ಅರ್ಥಹಿಸಿ ಹೇಳಿದರು ಅರ್ಥವಾಗದ ಜನರಿಗೆ ಅರ್ಥವಾಗುವುದಿಲ್ಲ, ಅರ್ಥಹಿಸಲೇ ಬೇಕು ಎಂದು ಅರ್ಥಹಿಸಿದರೆ ಅದು ಅರ್ಥಹೀನವಾಗುವುದೆ ವಿನಹ ಅರ್ಥ ಗಹನವಾಗುವುದಿಲ್ಲ. 

ಇಷ್ಟೆ ಲುಂಗಿ ಹಾರಿದ ಪುಂಗಿ ದಾಸನ ಕಥೆ 😂

ಅರ್ಥ ಆದರೆ ಕನೆಕ್ಟ್ ಮಾಡಿಕೊಳ್ಳಿ .  

✍️ ಪೃಥ್ವಿರಾಜ್ ಕೊಪ್ಪ.

ನಂಬಿಕೆ ಇಲ್ಲದ ಮೇಲೆ ಸಂಬಂಧಗಳ ನೆರಳು ಕತ್ತಲೆಯಾದಂತೆ

 

ನಂಬಿಕೆ ಇಲ್ಲದ ಮೇಲೆ

ಸಂಬಂಧಗಳ ನೆರಳು ಕತ್ತಲೆಯಾದಂತೆ ಅನ್ನಿಸುತ್ತದೆ.
ಪ್ರತಿ ಮಾತು ಸಂದೇಹ, ಪ್ರತಿ ನೋಟದಲ್ಲಿ ಪ್ರಶ್ನೆ.
ಮನಸ್ಸು ತುಂಬಾ ಇದ್ದರೂ, ಮನಸು ಖಾಲಿಯಾಗಿರುತ್ತದೆ.
ಅವನಲ್ಲೋ, ಅವಳಲ್ಲೋ ನಂಬಿಕೆ ಕಡಿದಾಗ, ಮನದಾಳದಲ್ಲಿ ಭಯ ಬೇರೂರುತ್ತದೆ.

ನಂಬಿಕೆ ಇಲ್ಲದ ಮೇಲೆ ಪ್ರೀತಿ ಉಳಿಯುವುದಿಲ್ಲ,
ಉಳಿದರೂ ಅದು ಶಂಕೆಗಳ ಛಾಯೆಯಲ್ಲಿ ಹೊತ್ತಿಹೋಗುತ್ತದೆ.
ನಂಬಿಕೆ ಎಂಬ ಅದು ಮೂಲ, ಪ್ರೀತಿ ಎಂಬ ಅದು ಮರ.
ಮೂಲ ಕಡಿದಾಗ, ಮರ ಬಿಲ್ಲಾಗುವದೇ ಖಚಿತ.

ಹೆಚ್ಚು ಮಾತನಾಡಿದರೂ ಅರ್ಥವಿಲ್ಲ,
ನೋಡುವ ಕಣ್ಣುಗಳ ನಡುವೆ ನಡಿಗೆ ಅಜ್ಞಾತ.
ಒಮ್ಮೆ ಕಳೆದುಕೊಂಡ ನಂಬಿಕೆ ಹಿಂದಿರುಗುವುದು ಅಸಾಧ್ಯವಲ್ಲ,
ಆದರೆ ಮರಳಿ ಬರಬೇಕೆಂಬ ಇಚ್ಛೆ ಇರುವಾಗ ಮಾತ್ರ.

ನಂಬಿಕೆ ಇಲ್ಲದ ಮೇಲೆ, ಮೌನವೇ ನಿಜವಾದ ಮಾತು.
ಅವನ ನೋಟ ಕಳಪೆ, ಅವಳ ನಗು ಕೃತಕ.
ಈ ಹಂತ ಬಂದಾಗ, ಉಳಿಸುವ ಪ್ರಯತ್ನವೂ ತೂಕವಾಗಿ ಅನಿಸುತ್ತೆ.

ಒಮ್ಮೆ ನಂಬಿಕೆ ಕುಸಿದರೆ,
ಹೃದಯ ದಾರಿ ತಪ್ಪಿದ ನಾವಿಕನಾಗುತ್ತದೆ.
ಒಡನಾಡಿಯಾಗಿ ಇದ್ದವನು, ಅತಿಥಿಯಾಗಿ ಕಾಣುತ್ತಾನೆ.
ಪ್ರೀತಿಯ ಬೆಳಕು ಕತ್ತಲೆಗೆ ಒಳಗಾಗಿ,
ಆತ್ಮೀಯತೆಯ ಮಾತುಗಳು ನಿಷ್ಠುರವಾಗಿ ತಟ್ಟುತ್ತವೆ.

ಅವನ ಮಾತು ಸತ್ಯವೋ ಸುಳ್ಳೋ ಎಂದು ವಿಚಾರಿಸುವ ಕ್ಷಣ ಬಂದಾಗ,
ಆ ಪ್ರೀತಿ ತನ್ನ ಶುದ್ಧತೆಯನ್ನು ಕಳೆದುಕೊಳ್ಳುತ್ತೆ.
ಹುಡುಕಾಟ ಪ್ರಾರಂಭವಾಗುತ್ತದೆ –
ಅವನ ಮೊಬೈಲ್, ಅವಳ ಮೆಸೇಜ್, ಅವನ ಹೊಣೆಗಾರಿಕೆ...
ಆದರೆ ಈ ತನಿಖೆಯಲ್ಲಿ ನಂಬಿಕೆಯ ಅಂತ್ಯವಾಗಿರುತ್ತದೆ.

ಮುದ್ದಾದ ಕ್ಷಣಗಳು ಕತ್ತಲೆ ನೆನಪಾಗುತ್ತವೆ,
ಒಟ್ಟಿಗೆ ಇದ್ದ ಕ್ಷಣಗಳು ಈಗ ನಿಶ್ಶಬ್ದವಾಗಿವೆ.
ಒಮ್ಮೆ ಸಿಕ್ಕ ನೋಟಕ್ಕೇ ಹೃದಯ ಉಕ್ಕುತ್ತಿದ್ದದ್ದು,
ಈಗ ಎಷ್ಟೇ ಕಣ್ಣಲ್ಲಿ ಕಾಣಿಸಿದರೂ, ಶಂಕೆ ಮಾತ್ರ ಮಿಡಿಯುತ್ತದೆ.

ನಂಬಿಕೆ ಇಲ್ಲದ ಪ್ರೀತಿ ಎಂಬುದು –
ಮರಳುಗಾಡಿನಲ್ಲಿ ಮಳೆಗಾಗಿ ಕಾಯುವಂತದು.
ಆಶೆಯ ಕುಡಿಯುವ ನೀರಿಲ್ಲ,
ಮಾತುಗಳ ಶಾಖದಲ್ಲಿ ಪ್ರೀತಿ ಬತ್ತುತ್ತದೆ.

ಆದರೆ...
ಒಂದು ಕ್ಷಣ – ನಂಬಿಕೆ ಮರಳಿ ಬರಬಹುದು ಎಂಬ ಆಶಯ ಇದ್ದರೆ?
ಒಬ್ಬರು ಮೌನ ಮುರಿದು, ಇತಿಹಾಸವನ್ನೇ ಬದಲಾಯಿಸುತ್ತಾರೆ ಎಂದಾದರೆ?
ಅದಕ್ಕಾಗಿ ಬೇಕಾದದ್ದು – ನಿಜವಾದ ಪಶ್ಚಾತಾಪ, ಸ್ಪಷ್ಟತೆ, ಮತ್ತು ಸಮಯ.

ಮುಗಿಯದ ನುಡಿಗಳು:

ನಂಬಿಕೆ ಇಲ್ಲದ ಮೇಲೆ ಪ್ರೀತಿ ಅಸ್ತಿತ್ವದಲ್ಲಿರಬಹುದು,
ಆದರೆ ಅದು ಸದಾ ಹೋರಾಟದಲ್ಲಿರುತ್ತದೆ –
ಒಂದೊಂದು ಕ್ಷಣಕ್ಕೂ, ಒಂದು ಸುತ್ತು ನಾನಾ ಪ್ರಶ್ನೆಗಳಿಗೆ ಒಳಪಡುತ್ತದೆ.
ಪ್ರೀತಿಯನ್ನು ಬದುಕಿಸಲು ನಂಬಿಕೆಯೇ ಆಮ್ಲಜನಕ.
ಅದಿಲ್ಲದೆ ಪ್ರೀತಿಯು ಉಸಿರಾಡುವುದಿಲ್ಲ.

✍️ ಪೃಥ್ವಿರಾಜ್ ಕೊಪ್ಪ 

ಜೀವನದಲ್ಲಿ ಪ್ರತಿ ತಿರುವು ಮುಂದಿನ ತಿರುವಿಗೆ ಪೂರಕವಾಗಿರುತ್ತದೆ

 ಜೀವನದಲ್ಲಿ ಪ್ರತಿ ತಿರುವು ಮುಂದಿನ ತಿರುವಿಗೆ ಪೂರಕವಾಗಿರುತ್ತದೆ

ಜೀವನ ಎಂದರೆ ನೇರರೇಖೆ ಅಲ್ಲ — ಅದು ತಿರುವುಗಳ, ಏರುಪೇರುಗಳ, ಆಶ್ಚರ್ಯಗಳ ಸಂಚಯ. ನಾವು ಎದುರಿಸುವ ಪ್ರತಿಯೊಂದು ತಿರುವು ಒಂದು ಪಾಠ. ಅದನ್ನು ಆ ಕ್ಷಣದಲ್ಲಿ ನೋವಿನಂತೆ ಅನಿಸಬಹುದು, ಆದರೆ ಮುಂದೆ ಹೋಗುವ ದಾರಿ ಅಂದರೆ ಅದೇ ಪಾಠದ ಬುನಾದಿ.

ಕಟ್ಟಡದೊಳಗಿನ ಪ್ರತಿಯೊಂದು ಇಟ್ಟಿಗೆ ಇನ್ನೊಂದು ಇಟ್ಟಿಗೆಯ ಆಧಾರವಾಗಿರುವಂತೆ, ಜೀವನದಲ್ಲಿಯೂ ಪ್ರತಿ ಅನುಭವ, ಪ್ರತಿ ನಿರ್ಧಾರ, ಪ್ರತಿ ತಪ್ಪು ಕೂಡ ಮುಂದಿನ ಹಂತದ ಪೂರಕವಾಗಿರುತ್ತದೆ. ನಾವು ಇಂದು ನೋಡುವ ಸೋಲು, ನಾಳೆಯ ಗೆಲುವಿಗೆ ಪೂರ್ವಭಾವಿಯಾಗಿರಬಹುದು. ನಾವೆಂದುಕೊಳ್ಳುವುದು "ಅಂತ್ಯ" ಎಂಬುದು, ಬಹುಷಃ ಹೊಸ ಅಧ್ಯಾಯದ ಆರಂಭವಾಗಿರಬಹುದು.

ಇದು ಹೇಗೆ ಸಾಧ್ಯ?
ಒಮ್ಮೆ ಯೋಚಿಸಿ — ನೀವು ಯಾವುದಾದರೂ ಸವಾಲು ಎದುರಿಸಿ, ಅದರಲ್ಲಿಂದ ಪಾಠ ಕಲಿತೀರಿ. ನಂತರ ಬಂದ ಮತ್ತೊಂದು ಸಮಸ್ಯೆಯನ್ನು ನೀವು ಸುಲಭವಾಗಿ ಎದುರಿಸಿದಿರಿ. ಅದುವರೆಗೆ ಕಂಡಿದ್ದ ಕಷ್ಟ, ಮುಂದೆ ನೀನು ನೋಡುವ ಬೆಳಕಿಗೆ ತಳಹದಿ ಹಾಕಿತ್ತೆಂಬುದು ನಿಮಗರ್ಥವಾಗುತ್ತದೆ. ಹಾಗಾಗಿಯೇ, ಹಿಂದೆ ನಡೆದ ತಿರುವುಗಳು, ಮುಂದಿನ ದಾರಿಗಳಿಗೆ ಕಣ್ಣು ತೆರೆಸುವ ಸಾಧನವಾಗುತ್ತವೆ.

ಪ್ರತಿಯೊಂದು ತಿರುವೂ ನಮ್ಮನ್ನು ರೂಪಿಸುತ್ತದೆ. ಕೆಲವೊಂದು bizi ತಿರುವುಗಳು ನಾವು ಯಾವಾಗಲೂ ನೆನೆಸಿಕೊಳ್ಳುವ ಪಾಠವಾಗಿ ಉಳಿಯುತ್ತವೆ. ಕೆಲವು ತಿರುವುಗಳು ನಮ್ಮನ್ನು ಬದಲಾಯಿಸುತ್ತವೆ, ನಮ್ಮ ದೃಷ್ಟಿಕೋಣವನ್ನೇ ಮರುಆಕರಿಸುತ್ತವೆ.

ಸಾರಾಂಶ:
ಜೀವನದಲ್ಲಿ ಎಲ್ಲವೂ ಕಾರಣವಿರದೆ ಸಂಭವಿಸದು. ಪ್ರತಿಯೊಂದು ಅನುಭವಕ್ಕೂ ಒಂದು ಉದ್ದೇಶವಿದೆ. ಪ್ರತಿಯೊಂದು ತಿರುವು ಮುಂದಿನ ತಿರುವಿಗೆ ದಾರಿ ತೋರಿಸುತ್ತವೆ. ಆತ್ಮವಿಶ್ವಾಸದಿಂದ, ಧೈರ್ಯದಿಂದ, ನಂಬಿಕೆಯಿಂದ ಮುಂದೆ ನಡೆದರೆ – ಪ್ರತಿಯೊಂದು ತಿರುವೂ ನಿನಗೆ ಬೆಳಕಾಗಿ ಮಾರ್ಗದರ್ಶನ ನೀಡುತ್ತದೆ.

✍️ ಪೃಥ್ವಿರಾಜ್ ಕೊಪ್ಪ 

ನಂಬಿಕೆ ಇಲ್ಲದ ಪ್ರೀತಿ ಹುಚ್ಚು ಕುದುರೆಯಂತೆ

 

ಪ್ರೀತಿಯಲ್ಲಿ ನಂಬಿಕೆ ಅತ್ಯಂತ ಮುಖ್ಯ.

ಯಾವಾಗಲೂ ಸಂದೇಹ ಪಡುವುದು ಸಂಬಂಧವನ್ನು ಹಾಳು ಮಾಡುತ್ತದೆ.

ಒಬ್ಬರ ಮೇಲೆ ಭರವಸೆ ಇಟ್ಟು ಬದುಕಿದಾಗ ಪ್ರೀತಿಗೆ ಅರ್ಥ ಬರುತ್ತದೆ.

ನಂಬಿಕೆ ಇಲ್ಲದೆ ಪ್ರೀತಿ ನಡೆಸುವುದು ಕಲ್ಲಿನ ಮೇಲೆ ಮನೆ ಕಟ್ಟಿದಂತೆ – ಯಾವ ಕ್ಷಣವಾದರೂ ಕುಸಿಯಬಹುದು.

ಹೃದಯದಿಂದ ನಂಬಿದರೆ, ಪ್ರೀತಿಯ ಬಂಧನ ಇನ್ನಷ್ಟು ಬಲವಾಗುತ್ತದೆ.

ಪ್ರೀತಿ ಅಂದರೆ ಹೃದಯಗಳ ಸಂಗಮ, ಆದರೆ ನಂಬಿಕೆ ಅಂದರೆ ಆ ಸಂಗಮದ ಅಡಿಷ್ಠಾನ.

ನಂಬಿಕೆ ಇರುವ ಸ್ಥಳದಲ್ಲಿ ಅರ್ಥಪೂರ್ಣ ಪ್ರೀತಿ ಮೂಡುತ್ತದೆ, ಅಲ್ಲದೆ ಯಾವುದೇ ಬಿಕ್ಕಟ್ಟುಗೂ ತಡೆಯಾಗುತ್ತದೆ.

ಯಾವಾಗಲೂ ಅನುಮಾನ ಪಡುತ್ತಾ ಹೋದರೆ, ಪ್ರೀತಿಯ ಮೌಲ್ಯವೇ ಕಳೆದುಹೋಗುತ್ತದೆ.

ಪ್ರತಿಯೊಬ್ಬರಿಗೂ ಸ್ವಾತಂತ್ರ್ಯ ಹಾಗೂ ವಿಶ್ವಾಸ ಬೇಕಾಗಿರುವಾಗ, ಸಂದೇಹವು ಬಂಧನ ತರುತ್ತದೆ.

ಪ್ರೇಮದಲ್ಲಿ ನಂಬಿಕೆಗೆ ಜಾಗವಿಲ್ಲದಿದ್ದರೆ, ಅದು ನಿಜವಾದ ಪ್ರೇಮವಲ್ಲ.

ಒಬ್ಬನನ್ನು ನಂಬಿದಾಗ ಮಾತ್ರ ಅವರೊಂದಿಗೆ ಭವಿಷ್ಯದ ಕನಸು ಕಟ್ಟಬಹುದು.

ಸಂದೇಹಗಳು ಪ್ರೀತಿಯನ್ನು ಕ್ಷೀಣಗೊಳಿಸುತ್ತವೆ, ನಂಬಿಕೆ ಮಾತ್ರ ಅದನ್ನು ಬಲಪಡಿಸುತ್ತದೆ.

ಹೃದಯವಿಟ್ಟು ಪ್ರೀತಿಸಿ, ಶ್ರದ್ಧೆಯಿಂದ ನಂಬಿದರೆ ಪ್ರೀತಿ ಶಾಶ್ವತವಾಗುತ್ತದೆ.

ಪ್ರೇಮವು ಕಣ್ಣಲ್ಲಿ ಕಾಣದು, ಅದು ನಂಬಿಕೆಯಲ್ಲಿ ಬದುಕುತ್ತದೆ.

ಒಬ್ಬರನ್ನು ನಂಬುವುದು ಅಂದರೆ, ಅವರ ತಪ್ಪುಗಳನ್ನು ಮನ್ನಿಸಿ ಮುಂದುವರಿಯುವುದು.

ನಂಬಿಕೆಯಿಲ್ಲದ ಪ್ರೀತಿ ಅಂತರಾಳದಲ್ಲಿ ತುಂಡಾಗುವ ಗಾಜು.

ಹೃದಯ ಕೊಡುವ ಮುನ್ನ ನಂಬಿಕೆ ನೀಡಬೇಕು, ಏಕೆಂದರೆ ಪ್ರೀತಿ ನಂಬಿಕೆಯ ಮೇಲೆ ಬಾಳುತ್ತದೆ.

ಅವನು/ಅವಳು ಎಷ್ಟು ದೂರ ಇದ್ದರೂ ನಂಬಿಕೆ ಇದ್ದರೆ ಪ್ರೀತಿ ಅದೆಷ್ಟೋ ಹತ್ತಿರವಾಗಿರುತ್ತದೆ.

ಸಂದೇಹಗಳು ಬಂದಾಗ ಮಾತನಾಡಿ, ಸಂಬಂಧ ಮುರಿಯಬೇಡಿ.

ನಂಬಿಕೆಯಿಂದಲೇ ಪ್ರೀತಿಯಲಿ ಶಾಂತಿ, ಸಂತೋಷ, ಮತ್ತು ಸಮಾಧಾನ ಇರುತ್ತದೆ.

ಪ್ರತಿಯೊಂದು ಸಂಬಂಧದಲ್ಲೂ ನಂಬಿಕೆ ಸ್ತಂಭವೋ, ಅದು ಉರುಳಿದರೆ ಪ್ರೀತಿ ಕುಸಿಯುತ್ತದೆ.

ಪ್ರೇಮಿಸಿ, ಆದರೆ ಮೊದಲಿಗೆ ನಂಬಿಕೆಗೆ ಸ್ಥಳ ನೀಡಿ – ಅದು ಎಲ್ಲವನ್ನೂ ಕಟ್ಟುತ್ತದೆ.

ಪ್ರೀತಿಯಲಿ ಮಾತುಗಳಿಗಿಂತ ನಂಬಿಕೆಯ ಶಕ್ತಿ ಹೆಚ್ಚು.

ನಂಬಿದವನು ದೂರವಾದರೂ ತೊಂದರೆಯಾಗುವುದಿಲ್ಲ, ಆದರೆ ಅನುಮಾನಿಸಿದವನು ಹತ್ತಿರವಿದ್ದರೂ ನರಕವೇ.

ನಂಬಿಕೆ ಉಳಿದರೆ ಸಂಬಂಧ ಉಳಿಯುತ್ತದೆ, ಇಲ್ಲದಿದ್ದರೆ ಪ್ರೀತಿ ನಿರರ್ಥಕ.

ಹುಡುಗರಿಗಾಗಲಿ ಹುಡುಗಿಯರಿಗಾಗಲಿ – ನಂಬಿಕೆ ಇರುವುದು ಪ್ರೀತಿಯ ಪ್ರಥಮ ಗುರಿ.

ಒಬ್ಬರನ್ನು ನಂಬುವುದು ಅಂದರೆ ಅವರ ನೆರಳಿಗು ಬೆನ್ನುಹತ್ತುವುದು – ಬೆಳಕು ಬರುವವರೆಗೆ.

ಸಂಬಂಧ ಉರುಳುವುದು ಹೆಚ್ಚು ವೇಳೆ ದೋಷದಿಂದ ಅಲ್ಲ, ನಿರಂತರವಾದ ಅನುಮಾನಗಳಿಂದ.

ನಿನ್ನ ಸಂಗಾತಿಯ ತೊಂದರೆಗಳನ್ನು ಕೇಳು, ಅವರ ನಿಶ್ಶಬ್ದವನ್ನೂ ಅರ್ಥಮಾಡಿಕೋ.

ನಂಬಿಕೆಯಿಂದ ಪ್ರೀತಿ ಬೆಳೆಯುತ್ತದೆ, ಅನುಮಾನದಿಂದ ಅದು ಉಡಿದು ಹೋಗುತ್ತದೆ.

ಪ್ರತಿ ಸಣ್ಣ ವಿಷಯವನ್ನೂ ಪ್ರಶ್ನಿಸುವ ಬದಲು, ಆ ವ್ಯಕ್ತಿಯೆಂಬ ಜೀವವನ್ನೇ ಒಮ್ಮೆ ನಂಬಿ ನೋಡಿ.

ಪ್ರೀತಿ ಎರಡೂ ಹೃದಯಗಳ ನಡುವಿನ ಒಪ್ಪಂದ. ನಂಬಿಕೆ ಅದು ಕಾಪಾಡುವ ಗೃಹಪ್ರವೇಶ.

ಅವನಿಗೆ ಅಥವಾ ಅವಳಿಗೆ ನಿನ್ನ ಮೇಲೆಯಾದ ನಂಬಿಕೆಯನ್ನು ತೋರಿಸು — ಅದು ಪ್ರೀತಿಗೆ ಉಸಿರಾಗುತ್ತದೆ.

ಪೃಥ್ವಿರಾಜ್ ಕೊಪ್ಪ

ಬಸ್ಸಿನ ಪಕ್ಕದ ಸೀಟಿನಲ್ಲಿ ಒಂದು ಭೂತ

 Seat Number UW28 😍 ಬಸ್ಸಿನಲ್ಲಿ ಒಂದು ಭೂತ 

ರಾತ್ರಿ 9.40 pm ಗಂಟೆ. ಊರಿಂದ ಬೆಂಗಳೂರಿಗೆ ಹೋಗುವ ಬಸ್‌ ಅದ್ಧೂರಿಯಾಗಿ ಬಂದು ನಿಂತಿತು.

ಸಿಂಗಲ್ ಸೀಟ್ ಇಲ್ಲದ ಕಾರಣ ಎರಡು ಸೀಟ್ನಲ್ಲಿ ಒಂದು ಕಿಟಕಿ ಬದಿಯ ಸೀಟ್ ಬುಕ್ ಮಾಡಿದ್ದೆ.

ನನ್ನ ಸೀಟು no UW28 ಹಾಗೆ ಬುಕ್ ಮಾಡಿದ ಸೀಟ್ಅನ್ನು ಹತ್ತಿ ಮಲಗಿದೆ.

ಪಕ್ಕದ ಸೀಟ್ನಲ್ಲಿ ಯಾರು ಬರುವರೆಂದು ಕಾಯುತ್ತಾ ಮಲಗಿದ್ದೆ ಸ್ವಲ ಸಮಯದ ನಂತರ ಬಸ್ ಹೊರಟಿತು. ಕಂಡಕ್ಟರ್ ಕೇಳಿ ತಿಳಿದುಕೊಂಡೆ ಪಕ್ಕದ ಸೀಟ್ ಬುಕ್ ಆಗಿಲ್ಲವೆಂದು ಕುಶಿಯಿಂದ ಫುಲ್ ಎರಡು ಸೀಟ್ ಸೇರಿ ಆರಾಮಾಗಿ ಮಲಗಬಹುದು ತಂದಿದ್ದ ಬ್ಲಾಂಕೆಟ್ ಹೊದ್ದು ಮಲಗಿದೆ.– 

ಸರಿಸುಮಾರು ಎರಡು ತಾಸಿನ ನಂತರ ಜೋರಾಗಿ ಗೊರಕೆ ಹೊಡೆಯುವ ಶಬ್ದ ಕೇಳಿ ಎಚ್ಚರವಾಯಿತು 

ಅದೇ ಸಮಯದಲ್ಲಿ ನನ್ನ ಪಕ್ಕದ ಸೀಟಿನಲ್ಲಿ ಒಬ್ಬ ಬಿಳಿ ಶರ್ಟ್, ಕಪ್ಪು ಜೀನ್ಸ್ ಧರಿಸಿರುವ, ಅಪರಿಚಿತ ವ್ಯಕ್ತಿ ಮಲಗಿದ್ದ . ಅವನು ನನ್ನ ಕಡೆ ನೋಡಿ ಒಮ್ಮೆ ನೋಡಿ ತುಸು ನಗುಹರಿಸಿದ್ದ. ನಾನು ಕೂಡ ತಲೆಅಡಗಿಸಿದಂತೆ ನಗುಮಾಡಿ  ಕಂಡಕ್ಟರ್ ಸುಳ್ಳು ಹೇಳಿದ್ದಾನೆ ಎಂದು ಮಗ್ಗಲು ಬದಲಿಸಿ ಮಲಗಿದೆ.

ಸ್ವಲ ಸಮಯದ ನಂತರ ಪಟ್ ಎಂದು ಅವನ ಕಾಲು ನನ್ನ ಕಾಲಿನ ಮೇಲೆ ಬಿತ್ತು , ಯಮ್ಮ ಎಂದು ಬೆಚ್ಚಿ ಬಿದ್ದೆ ! ಪಕ್ಕದವನು ಕರೆದೆ ಚಲನವಲನವೇ ಇರಲಿಲ್ಲ.

ಅರ್ಧ ಗಂಟೆ ಕಳೆದರೂ… ಅವನು ಎದ್ದಿಲ್ಲ. ನಾನು ಹೆದರಲಾರಂಭಿಸಿದೆ.

ಹೆದರಿ ಹೆದರಿ ಕೇಳಿದೆ – "ಸರ್…?"

ಯಾವುದೆ ಪ್ರತಿಕ್ರಿಯೆ ಇಲ್ಲ.

ಚಂಗನೆ ಅವನ ಮೇಲೆಇಂದ ಇಳಿದು ಕಂಡಕ್ಟರ್ ಹತ್ತಿರ ಓಡಿದೆ ಹಾಗೆ ನಡೆದ ವಿಷಯ ತಿಳಿಸಿದೆ! 

ಕಂಡಕ್ಟರ್ ಏನು ಕಾಮಿಡಿನ ಆ ಸೀಟ್ ಕಾಲಿ ಇದೆ ಎಂದು ಮೊದಲೆ ಹೇಳಿದೆ ತಾನೆ ಅಂದರು 

ಮೊದಲೆ ಹೆದರಿದ ನಾನು ಏನು ಸರ್ ಹೇಳ್ತಾ ಇದಿರಿ 

ಈಗ ಅಷ್ಟೆ ನನ್ನ ಪಕ್ಕ ಹಾಗಾದ್ರೆ ಮಲಗಿದ್ದು ಯಾರು ?

ಎಂದು ಇಬ್ಬರು ನನ್ನ ಸೀಟಿನ ಹತ್ತಿರ ಬಂದೆವು ಅಲ್ಲಿ ಯಾರೂ ಕೂಡ ಇರಲಿಲ್ಲ 😒 

ಏನ ಸರ್ ನಿಮಗೆ ಏನೊ ಕನಸು ಬಿದ್ದಿರುತ್ತೆ ಸುಮ್ಮನೆ ಮಲಕೊಳ್ಳಿ ಎಂದು ಗೊಣಗಿಕೊಂಡು ಹೋದ. 

ನಾನು ಇದು ಹೆಂಗೆ ಗುರು ನಿದ್ದೆ ಕಣ್ಣಲ್ಲಿ ನಾನು ಅವನನ್ನು ನೋಡಿದನ ಹಾಗಾದರೆ ಅವನು ಎಲ್ಲಿ 

ಒಂದು ಕ್ಷಣದಲ್ಲಿ ಕಂಡಕ್ಟರ್ ನಿಜ ನ ಸುಳ್ಳು ಮಾಡಿದನಲ್ಲ! ಇದರ ಬಗ್ಗೆ ಇನ್ವೆಸ್ಟಿಗೇಷನ್ ಆಗಲೇ ಬೇಕು ಎಂದು ಜಾಡು ಹಿಡಿದು ಕುಳಿತೆ.. 

ಬೆಂಗಳೂರಿಗೆ ಬರುವಾಗ ಜಾಲಹಳ್ಳಿ ಇಂದ ಕೆಂಪೇಗೌಡ ಬರುವರೆಗೂ ಇಳಿದವರನ್ನು ಬಗ್ಗಿ ನೋಡಿ ಹುಡುಕಿದೆ ನಾ ನೋಡಿದ ವಕ್ತಿ ಬಸ್ಸಿನಿಂದ ಇಳಿಯಲಿಲ್ಲ. 

ಹಾಗೆ ಬಸ್ಸು ಮುಂದೆ ನನ್ನ ಸ್ಟಾಪ್ ಶಾಂತಿನಗರದ ಕಡೆ ಚಲಿಸಿತು .. ನಾನು ಅಪ್ಪರ್ ಸೀಟ್ ಇಳಿದು ಇಳಿಯಲು ಡೋರ್ ಬಳಿಗೆ ನಡೆದುಕೊಂಡು ಬಂದು ನಿಂತೆ!  ತಕ್ಷಣ ಯಾರೋ ಕರೆದಹಾಗಾಯಿತು ! 

ಸರ್ ಸ್ವಲ್ಪ ಕಾಲು ತೆಗಿರಿ ಚಪ್ಪಲಿ ತೆಗಿಬೇಕು ಎಂದು 

ತಿರುಗಿ ನೋಡಿದರೆ ಬಿಳಿ ಶರ್ಟ್, ಕಪ್ಪು ಜೀನ್ಸ್ ಧರಿಸಿರುವ ಅದೆ ವ್ಯಕ್ತಿ ಮುಖ ನೋಡಿ ಮತ್ತೆ ಆದೆ ರೀತಿ ನಕ್ಕುಬಿಟ್ಟ | ಇವನೇ ಅವನು ಕನಸಲ್ಲ ನನಸು.

 । ರಾತ್ರಿ ನನ್ನ ಪಕ್ಕ ಮಲಗಿದ್ರಿ ತಾನೆ ಆಮೇಲೆ ಎಲ್ಲಿ ಹೋಗಿದ್ರಿ ಸರ್ ನೀವು ಎಂದೆ ! ?

ಅವರು ನಗುತ್ತಾ 😁ಸರ್ ನಮ್ದು ಕೆಳಗಡೆ ಸೀಟ್ 

ಅಲ್ಲಿ ನಮ್ಮ ಫ್ಯಾಮಿಲಿ ನಾನು ನನ್ನ ಮಗು ಹೆಂಡತಿ ಮಲಗಿದೆವು ನಾನು ಗೊರಕೆ ಹೊಡೆಯುವ ಕಾರಣಕ್ಕೆ ನನ್ನ ಮಗು ಮಲಗಲಿಲ್ಲ ಹಾಗು ಜಾಗ ಕೂಡ ಚಿಕ್ಕದಿತ್ತು 

ಮೇಲೆ ಸೀಟ್ ಖಾಲಿ ಇದ್ದ ಕಾರಣ ಬಂದು ಮಲಗಿದೆ ಎಂದರು.. 

ಅದು ಸರಿ ನಾನು ಕಂಡಕ್ಟರ್ ಇಬ್ಬರೂ ಬಂದು ನೋಡಿದ್ದಾಗ ನೀವು ಎಲ್ಲಿ ಹೋಗಿದ್ರಿ ? 

ಸರ್ ನೀವು ಕಂಡಕ್ಟರ್ ಗೆ ನನ್ನ ಎಬ್ಬಿಸಲು ಹೇಳಲು ಹೋಗಿದ್ದಿರೆಂದು ಯಾಕೆ ಸುಮ್ಮನೆ ಖಾಲಿ ಸೀಟ್ ನಲ್ಲಿ ಮಲಗಿಕೊಂಡರೆ ಕಂಡಕ್ಟರ್ ಸುಮ್ಮನೆ ಬಯ್ತಾರೆ ಎಂದು ನಾನು ಕೆಳಗಡೆ ಬಂದು ಮಲಗಿದೆ . 

ಮತ್ತೆ ನೀವು ಎಲ್ಲಿ ಇಳಿಯೋದು sir ಅಂತ ಕೇಳಿದರು …

ಎಂತಸಾವು ಮರ್ರೆ ನಿಮದ್ದು ಕಥೆ ಕೇಳಿ ನಾನು ಎಲ್ಲಿ ಇಳಿಬೇಕು ಅನ್ನೋದೆ ಮರೆತು ಹೋದೆ 🙈🙈🤪

✍️ ಪೃಥ್ವಿರಾಜ್ ಕೊಪ್ಪ 

ವ್ಯಕ್ತಿಯ ವ್ಯಕ್ತಿತ್ವವನ್ನು ಪ್ರಶ್ನೆ ಮಾಡಿದಾಗ ಅವನಲ್ಲಾಗುವ ಭಿನ್ನ ಅಭಿಪ್ರಾಯಗಳು

 

ತುಂಬಾ ಚಿಕ್ಕವಯಸ್ಸಿನಿಂದಲೇ ಪ್ರತಿಯೊಬ್ಬ ವ್ಯಕ್ತಿಗೂ ಒಂದು ಗಟ್ಟಿಯಾದ ಕನಸು ಇರುತ್ತದೆ – “ನಾನು ಒಳ್ಳೆಯ ಮನುಷ್ಯನಾಗಬೇಕು.” ಈ ಕನಸಿನೊಂದಿಗೆ ಆತನು ತನ್ನ ಜೀವನವನ್ನು ಕಟ್ಟಿಕೊಳ್ಳಲು ಪ್ರಯತ್ನಿಸುತ್ತಾನೆ. ತಾಯ್ತಂದೆಯ ಮಾತುಗಳನ್ನು ಕೇಳುತ್ತಾನೆ, ಅವರು ಹೇಳಿದಂತೆ ಒಳ್ಳೆಯ ಕೆಲಸಗಳನ್ನು ಮಾಡುತ್ತಾನೆ. ಯಾಕೆಂದರೆ, ತಾನು ಬೇರೆಯವರಿಗೆ ನೋವು ಕೊಡಬಾರದು ಎಂಬ ನಿಸ್ವಾರ್ಥ ಉದ್ದೇಶದಲ್ಲಿ ಜೀವನ ಸಾಗಿಸುತ್ತಾನೆ.

ಚಿಕ್ಕವಯಸ್ಸಿನಲ್ಲಿ ಶಾಲೆ, ಪಾಠ, ಪರೀಕ್ಷೆ ಈ ಎಲ್ಲದರ ಮಧ್ಯೆಯೂ ಆತನು ಗಟ್ಟಿಯಾಗಿ ಓದಿ, ತನ್ನನ್ನು ತಾನು ರೂಪಿಸಿಕೊಂಡು ಬಯಸುವ ವ್ಯಕ್ತಿತ್ವವನ್ನು ಬೆಳೆಸಲು ಹೆಣೆಯುತ್ತಾನೆ. ಯಾರಾದರೂ ಅವನ ತಂದೆ-ತಾಯಿಗೆ ಕೆಟ್ಟದಾಗಿ ಮಾತಾಡಿದರೂ, ಅದು ಅವನ ಮನಸ್ಸಿಗೆ ತುಂಬಾ ನೋವು ಉಂಟುಮಾಡುತ್ತದೆ. ತಾನೊಬ್ಬ ಒಳ್ಳೆಯ ಮಗನಾಗಬೇಕು, ತನ್ನ ತಂದೆ-ತಾಯಿಗೆ ಹೆಮ್ಮೆ ತರಬೇಕು ಅನ್ನೋ ಆಸೆ ಪ್ರತಿಯೊಬ್ಬನಲ್ಲೂ ಇರುತ್ತದೆ.

ಬಳಿಕ, ಜೀವನದಲ್ಲಿ ಏನಾದರೂ ಸಾಧಿಸಬೇಕು ಎಂಬ ಉದ್ದೇಶದಿಂದ, ತನ್ನ ಊರನ್ನು ಬಿಟ್ಟು ಹೊರಗಿನ ಊರಿಗೆ ಹೋಗುತ್ತಾನೆ. ಗೂಡಿನಿಂದ ಹಾರುವ ಹಕ್ಕಿಯಂತೆ ತನ್ನ ಕನಸುಗಳ ಕಡೆಗೆ ಹೆಜ್ಜೆ ಇಡುತ್ತಾನೆ. "ತುಂಬಾ ಕಷ್ಟಪಟ್ಟು ನಾನು ಬೆಳೆಯಬೇಕು, ನನ್ನ ಕುಟುಂಬವನ್ನು ಚೆನ್ನಾಗಿ ನೋಡಿಕೊಳ್ಳಬೇಕು" ಅನ್ನೋ ಗುರಿಯಿಂದ ಕೆಲಸ ಮಾಡುತ್ತಾನೆ.

ಅವನ ಕನಸು ಅಷ್ಟಲ್ಲ – ಸಮಾಜದಲ್ಲಿ ಒಬ್ಬ ಒಳ್ಳೆಯ ವ್ಯಕ್ತಿಯಾಗಿ ಗುರುತಿಸಿಕೊಳ್ಳಬೇಕು, ಎಲ್ಲರಿಗೂ ಪ್ರೀತಿ ಹಂಚಬೇಕು, ಯಾರಿಗೂ ನೋವು ಕೊಡಬಾರದು. ತನ್ನ ನಡೆ ನಡತೆಯಲ್ಲಿ ಎಲ್ಲಿ ಎಡವಿಕೆ ಆಗದಂತೆ ಎಚ್ಚರಿಕೆಯಿಂದ ನಡೆದುಕೊಳ್ಳುತ್ತಾನೆ. ಪ್ರತಿಯೊಬ್ಬರೂ “ಇವನು ಒಳ್ಳೆಯ ಮನುಷ್ಯ” ಎಂದು ಹೇಳಬೇಕು ಅನ್ನೋ ಬಲವಾದ ಇಚ್ಛೆಯಿಂದ ಆತನು ನಿರಂತರ ಶ್ರಮಿಸುತ್ತಾನೆ.

ಆದರೆ, ಕೆಲವೊಂದು ಸಮಯದಲ್ಲಿ – ಅಪ್ರತ್ಯಾಶಿತ ಘಟನೆಗಳು, ವ್ಯಕ್ತಿಗಳ ವರ್ತನೆ, ಅಥವಾ ಸಮಾಜದ ಅನ್ಯಾಯಗಳು – ಅವನ ಮನಸ್ಸಿನ ಮೇಲೆ ತೀವ್ರವಾದ ಪರಿಣಾಮ ಬೀರುತ್ತವೆ. ಕೆಲವೊಮ್ಮೆ ಅವನು ಕಳೆದುಹೋಗುತ್ತಾನೆ, ತಾನೂ ಕೇಳದೇ ತನ್ಮೂಲಕ ಯಾರಿಗಾದರೂ ನೋವುಂಟಾಗಬಹುದು. ಆಗ ಆತನು ನಿಜವಾದ ಜೀವನಪಾಠ ಕಲಿಯುತ್ತಾನೆ – ಒಳ್ಳೆಯವನು ಆಗುವುದು ಕೇವಲ ನಿರ್ಣಯವಲ್ಲ, ಅದು ಪ್ರತಿದಿನದ ಪ್ರಯತ್ನ.

ಒಬ್ಬ ವ್ಯಕ್ತಿ ತನ್ನ ಜೀವನದಲ್ಲಿ ತುಂಬಾ ಕಷ್ಟಪಟ್ಟು, ನಾನೊಬ್ಬ ಒಳ್ಳೆಯ ವ್ಯಕ್ತಿಯಾಗಬೇಕು ಎಂದು ಕನಸುಗಳನ್ನು ಕಟ್ಟಿಕೊಂಡು, ಸಹನೆ, ಶ್ರಮ, ಶಿಷ್ಟತೆ ಇವೆಲ್ಲವನ್ನು ಅಳವಡಿಸಿಕೊಂಡು ತನ್ನ ಭವಿಷ್ಯವನ್ನು ತಾನೇ ರೂಪಿಸಿಕೊಂಡಿರುತ್ತಾನೆ. ಅವನು ಪ್ರತಿಯೊಬ್ಬರೊಂದಿಗೆ ಶ್ರದ್ಧೆಯಿಂದ, ಪ್ರೀತಿಯಿಂದ ವರ್ತಿಸುತ್ತಾನೆ. ಯಾರಿಗೂ ನೋವು ಮಾಡಬಾರದು, ಯಾರಿಂದಲೂ ಕೆಟ್ಟತನ ಹೊಂದಬಾರದು ಎಂಬ ಉದ್ದೇಶದೊಂದಿಗೆ ಬದುಕು ಸಾಗಿಸುತ್ತಾನೆ.

ಆದರೆ, ಕೆಲವೊಮ್ಮೆ ಆತನ ಜೀವನದಲ್ಲಿ ಬರುವ ಕೆಲವೊಂದು ಘಟನೆಗಳು ಆತನ ಆಳವಾದ ಮಾನಸಿಕ ತೀವ್ರತೆಗೆ ಕಾರಣವಾಗುತ್ತವೆ. ಆತನು ತನ್ನ ಹೃದಯದ ನೋವುಗಳನ್ನು ಹಂಚಿಕೊಳ್ಳಲು ನಂಬಿರುವ ಸ್ನೇಹಿತರಿಗೆ ಅಥವಾ ಪ್ರೀತಿಸುವ ವ್ಯಕ್ತಿಗೆ ಹೇಳಿದಾಗ, ಅದೆನ್ನುವನ್ನು ಹಿಡಿದು ಅದನ್ನು ಅವನ ವಿರುದ್ದವೇ ಉಪಯೋಗಿಸಿದಾಗ ಆತನು ತುಂಬಾ ದುಃಖಿಸುತ್ತಾನೆ. ಅವನು ತನ್ನೊಳಗೆ ಮುಚ್ಚಿಕೊಳ್ಳುತ್ತಾನೆ, ಮೌನವಾಗುತ್ತಾನೆ. ತನ್ನ ವ್ಯಕ್ತಿತ್ವವನ್ನೇ ಪ್ರಶ್ನಿಸಲು ಶುರುಮಾಡುತ್ತಾನೆ – "ನಾನು ಏನು ತಪ್ಪು ಮಾಡಿದ್ದೇನೆ?" ಎಂದು.

ಇಷ್ಟೊಂದು ವರ್ಷಗಳ ಕಷ್ಟ, ಶ್ರಮ, ತ್ಯಾಗ ಇವೆಲ್ಲವನ್ನೂ ಮರೆತು, ನಿನ್ನೆಗಿನ ಅವಮಾನ ಅವನನ್ನು ನುಚ್ಚು ನೂರಾಗಿಸುತ್ತವೆ. ಆತನು ಪ್ರೀತಿಸಿದ, ನಂಬಿದ ವ್ಯಕ್ತಿಯಿಂದಲೇ ಅವನನ್ನು ತುಚ್ಛವಾಗಿ ಕಾಣಲಾಗುವುದು ಎಂಬುದು ಅವನ ನಂಬಿಕೆಯನ್ನು, ಆತ್ಮವಿಶ್ವಾಸವನ್ನೇ ನಾಶ ಮಾಡುತ್ತದೆ. “ನಿನ್ನ ನಡತೆ ಸರಿ ಇಲ್ಲ”, “ನೀನು ಯೋಗ್ಯವಿಲ್ಲ”, “ನಿನ್ನ ಹುಟ್ಟಿಗೆ ತಾಯ್ತಂದೆ ಕೇವಲ ಕಾರಣ” ಎಂದು ತೀಕ್ಷ್ಣವಾಗಿ ನಿಂದಿಸಲ್ಪಡುವಾಗ ಅವನು ದಿನವೊಂದಕ್ಕೆ ಕಷ್ಟಪಟ್ಟು ಕಟ್ಟಿಕೊಂಡ ಜೀವನವನ್ನೆಲ್ಲಾ ಪ್ರಶ್ನಿಸಲು ಆರಂಭಿಸುತ್ತಾನೆ.

ಈ ಹೀನ ವಾಕ್ಯಗಳು ಅವನಲ್ಲಿ ಒಳಿತಿಗೆ ಬದಲಾಗಿ ಕೆಟ್ಟತನವನ್ನೇ ಹುಟ್ಟುಹಾಕಬಹುದು. ಅವನು ದಿನದಿಂದ ದಿನಕ್ಕೆ ಮೌನವಾಗುತ್ತಾ, ಹಿಂಸೆಯೊಳಗೆ ಮುಳುಗುತ್ತಾ ತನ್ನ ಕನಸುಗಳನ್ನು, ಆಸೆಗಳನ್ನು ಮರೆಯುತ್ತಾನೆ. “ನಾನೊಬ್ಬ ಒಳ್ಳೆಯವನಾಗಬೇಕು” ಎಂಬ ಉದ್ದೇಶವನ್ನು ಬದಿಗೊತ್ತಿ, "ನಾನೇ ತಪ್ಪು ಇದ್ದೆನೇ?" ಎಂಬ ಆತ್ಮವ್ಯಾಕುಲತೆಗೆ ಒಳಗಾಗುತ್ತಾನೆ.

ಈಗಲೂ ಯಾರಾದರೂ ಅವನನ್ನು “ನೀನು ಸರಿ ಇಲ್ಲ”, “ನಿನ್ನ ವ್ಯಕ್ತಿತ್ವವೇ ತಪ್ಪು” ಎಂದು ಪದೇಪದೇ ಹೇಳಿದರೆ, ಆ ವ್ಯಕ್ತಿಯ ನಂಬಿಕೆಗಳು, ಆತ್ಮವಿಶ್ವಾಸ, ಮತ್ತು ಮನೋಬಲ – ಇವೆಲ್ಲವೂ ನಿಧಾನವಾಗಿ ಕುಸಿದು ಹೋಗುತ್ತವೆ. ಅವನು ತನ್ನೊಳಗಿನ ತಾಳ್ಮೆ, ಶಾಂತಿ, ಗುರಿ ಎಲ್ಲವನ್ನೂ ಕಳೆದುಕೊಳ್ಳುತ್ತಾನೆ.

ಒಳ್ಳೆಯ ಮನುಷ್ಯನಾಗಬೇಕೆಂಬ ಕನಸು ಎಲ್ಲಾ ಜನರಲ್ಲೂ ಇರುತ್ತದೆ. ಆದರೆ ಅದನ್ನು ನಿಜವಾಗಿಸಲು ಶ್ರದ್ಧೆ, ಶಿಸ್ತು ಮತ್ತು ಪ್ರಾಮಾಣಿಕತೆ ಅಗತ್ಯ. ಜೀವನವು ಸವಾಲುಗಳಿಂದ ತುಂಬಿರುವರೂ, ನಮ್ಮೊಳಗಿನ ಮಾನವೀಯತೆ, ಮೌಲ್ಯಗಳು ಮತ್ತು ಸತ್ಯಪಥವೇ ನಿಜವಾದ ವ್ಯಕ್ತಿತ್ವವನ್ನು ನಿರ್ಮಾಣ ಮಾಡುತ್ತದೆ.

ಒಬ್ಬ ವ್ಯಕ್ತಿಯ ನಡತೆ, ವ್ಯಕ್ತಿತ್ವವನ್ನು ತೀರ್ಮಾನಿಸುವ ಮೊದಲು ನಾವು ಅವನು ಎಂತಹ ಸಂಕಟಗಳಿಂದ, ಎಂತಹ ಹೋರಾಟಗಳಿಂದ, ಎಂತಹ ತ್ಯಾಗದಿಂದ ಮುಂದೆ ಬಂದಿದ್ದಾನೆ ಎಂಬುದನ್ನು ತಿಳಿಯಬೇಕಾಗಿದೆ. ಅವನ ಕನಸುಗಳನ್ನು ನಾವು ಅರ್ಥಮಾಡಿಕೊಳ್ಳದೇ ನುಚ್ಚು ನೂರಾಗಿಸಿದರೆ, ಅದು ಕೇವಲ ಅವನ ಜೀವನವನ್ನೇ ಅಲ್ಲ, ಅವನು ಕಟ್ಟಿಕೊಂಡ ನಂಬಿಕೆಗಳನ್ನೂ ಸುಟ್ಟು ಹಾಕುತ್ತದೆ. ಪ್ರತಿಯೊಬ್ಬನ ಹೃದಯದಲ್ಲಿ ತಮ್ಮದೇ ಆದ ನಂಟು, ನೋವು, ನೆನಪುಗಳ ಭಾರವಿದೆ – ಅವುಗಳಿಗೆ ಗೌರವ ನೀಡುವುದು ನಿಜವಾದ ಮಾನವೀಯತೆ.

ಪೃಥ್ವಿರಾಜ್ ಕೊಪ್ಪ.

ನಮ್ಮ ಮಲೆನಾಡ ಅಂದಿನ ಗೌರಿ ಗಣೇಶ

 

ನಮ್ಮ ಮಲೆನಾಡ ಅಂದಿನ ಗೌರಿ ಗಣೇಶ

ಸ್ನೇಹಿತರೆ ನಮಗೆಲ್ಲಾ ಮಲೆನಾಡು‌, ಮಲೆನಾಡಿನ ಸಂಸ್ಕೃತಿಗಳು, ಹಬ್ಬ ಹರಿದಿನಗಳು ಅಂದರೆ ನೆನಪಾಗೋದು ಹಳ್ಳಿ ಮನೆ ಬಾಗಿಲಿಗೆ ಹಾಕಿದ ಮಾವು ಹಲಸಿನ ತೊರಣ, ಮನೆಮುಂದೆ ದೊಡ್ಡದೊಂದು ಅಂಗಳ, ಆ ಅಂಗಳಕ್ಕೆ ಸಗಣಿಯಿಂದ ಸಾರಿಸಿ ದೊಡ್ಡದಾಗಿ ಬಿಡಿಸಿದ ರಂಗೋಲಿ, ಆ ರಂಗೋಲಿಗೆ ಬಣ್ಣ ಹಾಕಲು ತಾಮುಂದು ನಾಮುಂದು ಎಂದು ಕಿತ್ತಾಡುವ ಹೆಣ್ಣುಮಕ್ಕಳು, ಅಲ್ಲೇ  ಜೊತೆಗೆ ಬುಗುರಿ ಚಿನ್ನಿದಾಂಡು, ಗೋಲಿ ಆಡುತ್ತಿರುವ ಗಂಡುಮಕ್ಕಳು, ಮನೆತುಂಬ ಜನ ,ತೋಟದಲ್ಲಿ ಆಳುಕಾಳುಗಳು ಹೀಗೆ ಸಡಗರ ಸಂಭ್ರಮದ ವಾತಾವರಣ. ಇನ್ನು ಗಣೇಶ ಹಬ್ಬದ ದಿನದಂದೇ ಅಡಿಕೆ ಕೊನೆ ತೆಗೆಯಲು ಮುಹೂರ್ತ ಪೂಜೆ ಅಂದೇ. ಅಮ್ಮ ಅಡುಗೆ ಮನೆ ಬಿಟ್ಟು ಹೊರಬರುವುದೇ ಕಷ್ಟ. ಆ ಮದ್ಯದಲ್ಲಿ ಕಡುಬು, ಮೋದಕ,ಚಕ್ಕುಲಿ,ಪಂಚಕಜ್ಜಾಯ, ಹೋಳಿಗೆ,ಕೋಡುಬಳೆ‌,ನಿಪ್ಪಟ್ಟು,ತರಾವರಿ ತಿಂಡಿಗಳ ಪರಿಮಳ,ಮನೆ ಒಳಗೆ ಅಡುಗೆಕೆಲಸದಲ್ಲಿನಿರತ ಮಹಿಳೆಯರಾದರೆ, ಹೊರಗೆ ತೋರಣ, ದೇವರಿಗೆ ಮಂಟಪ, ಆ ಮಂಟಪಕ್ಕೆ ಅಲಂಕಾರ, ಫಲವಸ್ತು ಕಟ್ಟಿ ತಳಿರುತೋರಣಗಳಿಂದ ಅಲಂಕೃತವಾದ ಮಂಟಪದಲ್ಲಿ ಗೌರಿಗಣೇಶರನ್ನು ಸ್ವಾಗತಿಸುವಲ್ಲಿ ಪುರುಷರೂ ನಿರತರು. ಮನೆತುಂಬಾ ನೆಂಟರಿಷ್ಟರು, ಅವರಮಕ್ಕಳು ಇನ್ನು ಪಟ್ಟಣಕ್ಕೆ ಕೆಲಸದನಿಮಿತ್ತ ತೆರಳಿದ ಮಕ್ಕಳು ಸಂಸಾರ‌ ಸಮೇತ ಹಬ್ಬಕ್ಕೆ ಊರಿಗೆ ಹಾಜರ್.ಒಂಟಿಮನೆ, ಮನೆತುಂಬಾ ಜನ , ಹೀಗೆ ಪ್ರಾರಂಭ ನಮ್ಮ ಮಲೆನಾಡ‌ಗೌರಿಗಣೇಶ ಹಬ್ಬ. ಪಟ್ಟಣದ ಮಕ್ಕಳಿಗೆ ೧೦೮ ಗಣೇಶ ನೋಡುವ ಖುಷಿ ಇದ್ದರೆ, ನಮಗೆ‌ ಅದೆಲ್ಲಾ ಗೊತ್ತೇ ಇಲ್ಲ. ನಮ್ಮನೆ ಹೆಚ್ಚಂದರೆ ನಮ್ಮ ತೋಟ ದಾಟಿ ಇನ್ನೊಂದೆರಡು ಮನೆಗೆ‌ ಅಮ್ಮ ಕುಂಕುಮಕ್ಕೆ ಹೊದರೆ ಜೊತೆಗೆ ಹೋಗೋ ಅಭ್ಯಾಸ ಅಷ್ಟೇ. ನಮ್ಮ‌ಮನೆನೇ ನಮಗೆ ಪ್ರಪಂಚ. ನಮ್ಮ ತೋಟ ನಮ್ಮ ಗದ್ದೆ ನಮ್ಮ ಕಾಡು ಮನೆಲಿರೊ ನಾಯಿಮರಿ ಹಸು, ಕರು ಇವೇ ನಮ್ಮ ಗೆಳೆಯರು. ಗೌರಿ ಗಣೇಶ ಹಬ್ಬ ಅಂದರೆ ಅದೇ ಜೋರು ಹಬ್ಬ ನಮಗೆ ಬೆಳಿಗ್ಗೆ ಬೇಗ ಎದ್ದು ಮನೆ ಗುಡಸಿ ಸಾರಸಿ ರಂಗೋಲಿ ಹಾಕಿ ಹೊಸ ಬಟ್ಟೆ ತೊಟ್ಟು ರೆಡಿ ಆದರೆ ಮನೆ ಹಿರಿಯರದೇ ಪೌರೋಹಿತ್ಯ‌. ಉಳಿದೆಲ್ಲರೂ ಪೂಜೆ ಮಾಡಬೇಕು. ಹಿರಿಯರ ಮಾತೆ ವೇದವಾಕ್ಯ, ಅವರು ಹೇಳಿದ ಹಾಗೇ ಪೂಜೆಗೆ ಅಣಿ ಆಗುತ್ತಿತ್ತು, ಗೌರಿಗೆ ಗಣೇಶಂಗೆ ಇಷ್ಟದ ಅಡುಗೆಗಳು ರೆಡಿ ಆದರೆ ಮಕ್ಕಳಿಗೆ ತಿಂಡಿ ಇಲ್ಲ ಅನ್ನೋದೇ ಚಿಂತೆ. ವ್ರತ ಮುಗಿಯೋದೇ ತಡ ನೈವೇದ್ಯಕ್ಕೆ ಇಟ್ಟ ಹಣ್ಣುಗಳೇ ಫಲಹಾರ. ಮದ್ಯನ್ಹಕ್ಕೆ ರುಚಿಕರವಾದ ಬಗೆಬಗೆಯ ಖಾದ್ಯಗಳೊಂದಿಗೆ ಹಬ್ಬದ ಊಟ ಮುಗಿಸುವಾಗ ಸಂಜೆಗೆ ಪೂಜೆ ಜೊತೆಗೆ ಗಣಪತಿ ಬಿಡೋ ಸಂಭ್ರಮದೊಂದಿಗೆ ನಮ್ಮ ಮಲೆನಾಡ ಗೌರಿಗಣೇಶಕ್ಕೆ ತೆರೆ ಬೀಳುತ್ತಿತ್ತು. ಆದರೆ ಈಗ ಕಾಲ ಬದಲಾಗಿದೆ. ಕುಟುಂಬದ ವ್ಯಾಖ್ಯಾನವೇ ಬದಲಾದ ನಂತರ ಮನೆ ನಾನು ನನ್ನ ಹೆಂಡತಿ ಮಕ್ಕಳು ಒಟ್ಟಿಗೆ ಇರುವುದೇ ಹಬ್ಬವೇನೋ ಎನ್ನುವಂತಾಗಿದೆ.ಹಳ್ಳಿ ಮನೆಗಳಲ್ಲಿ ಹಿರಿಯರು ಮಾತ್ರ ವಾಸವಿದ್ದು ಮಕ್ಕಳು ಬರುತ್ತಾರೇನೋ ಎಂಬ ನಿರೀಕ್ಷೆಯೊಂದಿಗೆ ಪ್ರಾರಂಭವಾಗಿ ಮುಂದಿನ ಬಾರಿ ಬರಬಹುದೆಂಬ ಸಮಾದಾನದೊಂದಿಗೆ ಮುಗಿಯುತ್ತದೆ. ನಾನು ನನ್ನದು ನನ್ನತನ ಇರುವುದೇ ಈ ಹಳೆ ಸಂಪ್ರದಾಯದಲ್ಲಿ. ನಾವು ಹಬ್ಬಕ್ಕಾದರೂ ಒಟ್ಟಿಗೆ ಸೇರಿದರೆ ನಮ್ಮ ಮಕ್ಕಳಿಗೆ ಅವರ ಸಂಬಂದಿಗಳ ಪರಿಚಯವಾಗುತ್ತದೆ. ನಮ್ಮ ನೆರೆ ಹೊರೆ ಪ್ರೀತಿವಿಶ್ವಾಸಗಳ ಅರಿವಾಗುತ್ತದೆ. ಇದನ್ನರಿತು  ನಾವು ಹಬ್ಬಗಳನ್ನು ಒಗ್ಗಟ್ಟಾಗಿ ಸಂಭ್ರಮಿಸುವುದನ್ನು ಕಲಿಯಬೇಕಿದೆ. ನಮ್ಮ ಮಲೆನಾಡ ಸಂಸ್ಕೃತಿಗಳು ನಿಜಕ್ಕೂ ಅದ್ಬುತವಾಗಿದ್ದು ಪ್ರತಿ ಹಬ್ಬಗಳಿಗೂ ಅದರದೇ ಆದ ವೈಜ್ಞಾನಿಕ ಕಾರಣಗಳೂ ಸಹ ಇದೆ. ಹಾಗೂ ಹಬ್ಬಗಳಲ್ಲಿ ಬಳಸುವ ತರಕಾರಿಗಳು ಸಹಿ ಪದಾರ್ಥ ಗಳೊಂದಿಗೆ ಸಹ ವೈಜ್ಞಾನಿಕ ಹಾಗೂ ವೈಚಾರಿಕತೆ‌ ಅಡಗಿದೆ ಎಂಬುದನ್ನು ನಾವು ಗಮನಿಸಲೇ ಬೇಕು. ನಮ್ಮ ಸಂಸ್ಕೃತಿಯಲ್ಲಿ ನಾವು ಮಾಡುವ ಪ್ರತಿ ಹಬ್ಬಹರಿದಿನಗಳಿಗೆ‌ ಅದರದ್ದೇ ಆದ ಕಾರಣಗಳಿವೆ ಮತ್ತು   ಆಗಿನ ಹವಾಮಾನಕ್ಕೂ ಸಂಬಂದಿಸಿದಂತಿದೆ ಎಂಬುದು ಗಮನಾರ್ಹ ವಾದ ಸಂಗತಿಯಾಗಿದೆ.. ಇಂತಹ ಹಬ್ಬಗಳ ಸಾಲಿಗೆ ಭಾದ್ರಪದ ಶುದ್ದ ಚೌತಿ ದಿನ ಈ ಗಣೇಶನ ಹಬ್ಬ ಒಂದು. ಅವನಿಗಾಗಿ ಮಾಡುವ  ಮೋದಕ ಕಜ್ಜಾಯಗಳೊಂದಿಗೆ‌ ಎಲ್ಲರ‌ಮನೆ‌ ಹಾಗೂ ಮನಗಳಲ್ಲಿ ಸದಾ ಹರುಷ ತರಲಿ ಎಂದು ಬೇಡುತ್ತೇನೆ...

 ✍️ಚೇತನಾ.ಎಸ್.ಶೃಂಗೇರಿ

ಲವ್ ಮಾಕ್ಟೈಲ್ ಯಶಸ್ಸಿನ ನಂತರ ಲೋಕಲ್ ಟ್ರೈನ್ ಮೂಲಕ ಮತ್ತೆ ಎಂಟ್ರಿ ಕೊಡುತ್ತಿರುವ ನಟ ಡಾರ್ಲಿಂಗ್ ಕೃಷ್ಣ..!

ಹೌದು ಇತ್ತೀಚಿಗೆ ನಟ ಡಾರ್ಲಿಂಗ್ ಕೃಷ್ಣ ಹಾಗೂ ಮಿಲನಾ ನಾಗರಾಜ್ ಕಾಂಬಿನೇಷನ್ ನಲ್ಲಿ ಲವ್ ಮಾಕ್ಟೈಲ್-2 ಸಿನಿಮಾ ಭರ್ಜರಿಯಾಗಿ ಹಿಟ್ ಆಗಿದೆ. ಕೋವಿಡ್ ನಡುವೆ ಲವ್ ಮಾಕ್ಟೈಲ್ ಸಿನಿಮಾ ಮಾಡಿ, ಸಿನಿ ಪ್ರೇಕ್ಷಕರನ್ನು ಹೆಚ್ಚು ರಂಜಿಸಿ ಇನ್ನೊಂದು ಕಡೆ ನಿಧಿಮಾ ನೆನಪಲ್ಲಿಯೇ ಕಣ್ಣೀರು ಹಾಕಿಸಿದ್ದ ಈ ಜೋಡಿ ಮತ್ತೊಮ್ಮೆ ತೆರೆಯ ಮೇಲೆ ಲವ್ ಮಾಕ್‌ಟೇಲ್ 2 ಮಾಡಿ ಗೆದ್ದಿದೆ ಎನ್ನಬಹುದು. ಹೌದು ನಾಯಕ ನಟ ಕೃಷ್ಣ ಅವರ ಮತ್ತೊಂದು ದೀರ್ಘಾವಧಿಯ ಚಿತ್ರ ಲೋಕಲ್ ಟ್ರೈನ್ ಈಗ ಎಲ್ಲಾ ಸಿದ್ಧತೆ ಮಾಡಿಕೊಂಡು ಅಂತಿಮವಾಗಿ ತೆರೆಗೆ ಬರಲು ಸಜ್ಜಾಗಿದೆಯಂತೆ. ಸಿನಿಮಾ ಇದೆ ಏಪ್ರಿಲ್ ಒಂದಕ್ಕೆ ಬರುತ್ತಿದ್ದು, ಅಭಿಮಾನಿಗಳು ಇಟ್ಟ ಆ  ನಿರೀಕ್ಷೆಯನ್ನು ನಿಜ ಮಾಡಲು ಎಂಟ್ರಿ ಕೊಡುತ್ತಿದೆ. 

ಲೋಕಲ್ ಟ್ರೈನ್ ಸಿನಿಮಾವನ್ನ ಎಸ್ ಹೆಚ್ ವಾಲ್ಕೆ ಅವರು ನಿರ್ಮಾಣ ಮಾಡುತ್ತಿದ್ದಾರೆ. ಮೀನಾಕ್ಷಿ ದೀಕ್ಷಿತ್, ಎಸ್ಟರ್ ನೊರೊನ್ಹಾ ಮತ್ತು ಸಾಧು ಕೋಕಿಲಾ ಕೂಡ ನಟಿಸಿರುವ ಆಕ್ಷನ್ ಹಾಗೂ ಸಕತ್ ರೋಮ್ಯಾಂಟಿಕ್ ಚಿತ್ರ ಲೋಕಲ್ ಟ್ರೈನ್ ಏಪ್ರಿಲ್ 1 ರಂದು ಬರುತ್ತಿದೆ. ಹೌದು ನಿರ್ದೇಶಕ ರುದ್ರಮಣಿ ನಿರ್ದೇಶನದಲ್ಲಿ ಈ ಲೋಕಲ್ ಟ್ರೈನ್ ಸಿನಿಮಾ ಮೂಡಿ ಬರುತ್ತಿದ್ದು ತಮ್ಮ ದೈನಂದಿನ ಚಟುವಟಿಕೆಗಳಿಗಾಗಿ ರೈಲಿನಲ್ಲಿ ಪ್ರಯಾಣಿಸುವ ಜನರ ಸುತ್ತವೆ ಸುತ್ತುತ್ತದಂತೆ ಈ ಲೋಕಲ್ ಟ್ರೈನ್ ಸಿನಿಮಾ ಕಥೆ. ಹೌದು ಸುಬ್ರಾಯ ವಾಲ್ಕೆ ಅವರ ಬೆಂಬಲದೊಂದಿಗೆ, ಲೋಕಲ್ ಟ್ರೈನ್‌ನಲ್ಲಿ ಭಜರಂಗಿ ಲೋಕಿ ಪ್ರತಿಸ್ಪರ್ಧಿಯಾಗಿ ಕಾಣಿಸಿಕೊಂಡಿದ್ದಾರೆ..

ಅರ್ಜುನ್ ಜನ್ಯ ಸಂಗೀತವಿದ್ದು, ಲೋಕಲ್ ಟ್ರೈನ್ ಚಿತ್ರಕ್ಕೆ ರಮೇಶ್ ಬಾಬು ಅವರು ಛಾಯಾಗ್ರಹಣ ನೀಡಿದ್ದಾರೆ. ಲವ್ ಮಾಕ್ಟೈಲ್ 2 ರ ನಂತರ, ನಟ ಡಾರ್ಲಿಂಗ್ ಕೃಷ್ಣ ಅವರು ತಮ್ಮ ನಟನೆಯ ಕಾರ್ಯಯೋಜನೆಯ ಮೇಲೆ ಹೆಚ್ಚು ಸಕಾರಾತ್ಮಕವಾಗಿ ಕೇಂದ್ರೀಕರಿಸುತ್ತಿದ್ದಾರೆ. ಹೌದು ಹೆಚ್ಚು ಸಿನಿಮಾಗಳಲ್ಲಿ ಬಿಜಿ ಇರುವ ನಟ ಡಾರ್ಲಿಂಗ್ ಕೃಷ್ಣ ಅವರ ಕೈಯ್ಯಲ್ಲಿ ಇದೀಗ ಸಾಕಷ್ಟು ಸಿನಿಮಾಗಳು ತೆರೆಗೆ ಬರಲು ಸಜ್ಜಾಗಿವೆ. ಲಕ್ಕಿ ಮ್ಯಾನ್ ಬಿಡುಗಡೆಗೆ ಎದುರು ನೋಡುತ್ತಿರುವ ನಟ ಕೃಷ್ಣ ಅವರು, ಶುಗರ್ ಫ್ಯಾಕ್ಟರಿ, ದಿಲ್ ಪಸಂದ್, ಲವ್ ಮಿ ಆರ್ ಹೇಟ್ ಮಿ, ಹಾಗೆ ಮತ್ತೊಂದು ಪ್ರೇಮ್ ಕಹಾನಿ ಲವ್ ಬರ್ಡ್ಸ್ ಸಿನಿಮಾ ನಿರ್ಮಾಣದ ವಿವಿಧ ಹಂತಗಳಲ್ಲಿದ್ದಾರೆ ಎಂದು ಹೇಳಲಾಗುತ್ತಿದೆ. ಈ ಮಾಹಿತಿ ಬಗ್ಗೆ ನಿಮ್ಮ ಅಭಿಪ್ರಾಯ ತಿಳಿಸಿ ಹಾಗೆ ಎಲ್ಲರೂ ತಪ್ಪದೆ ಏಪ್ರಿಲ್ ಒಂದಕ್ಕೆ ಲೋಕಲ್ ಟ್ರೈನ್ ಸಿನಿಮಾವನ್ನು ಥಿಯೇಟರ್ ನಲ್ಲೇ ವೀಕ್ಷಿಸಿ ಪ್ರೋತ್ಸಾಹ ನೀಡಿ ಧನ್ಯವಾದ..

ವಿಭಿನ್ನ ಅನುಭವ ನೀಡಲು ತೆರೆಗೆ ಅಪ್ಪಳಿಸಲು ಸಜ್ಜಾದ ತ್ರಿಕೋನ..! ಯಾವಾಗ ಬಿಡುಗಡೆ ಗೊತ್ತಾ..?

Highlights

1. ವಿಭಿನ್ನ ಅನುಭವ ನೀಡಲು ತೆರೆಗೆ ಅಪ್ಪಳಿಸಲು ಸಜ್ಜಾದ              ತ್ರಿಕೋನ..

2. ಸಿನಿಮಾ ಇದೆ ಏಪ್ರಿಲ್ ಒಂದಕ್ಕೆ ಭರ್ಜರಿಯಾಗಿ ಎಂಟ್ರಿ..

3. ಚಂದ್ರಕಾಂತ್ ನಿರ್ದೇಶನದಲ್ಲಿ ಮೂಡಿಬಂದ ತ್ರಿಕೋನ.. 

4. ತ್ರಿಕೋನದಲ್ಲಿ ಜಲಕ್ ನೀಡಲಿರುವ ಕನ್ನಡದ ಅತಿ ದೊಡ್ಡ           ತಾರಬಳಗ..

ಬೆಂಗಳೂರು: ನಿರ್ಮಾಪಕ-ಬರಹಗಾರ ಆಗಿರುವ ರಾಜಶೇಖರ್ ಅವರ ಮುಂಬರುವ ಚಂದ್ರಕಾಂತ್ ನಿರ್ದೇಶನದ 'ತ್ರಿಕೋನ' ಒಂದು ಆಕ್ಷನ್ ಥ್ರಿಲ್ಲರ್ ಸಿನಿಮಾ ಆಗಿದ್ದು, ಇದು ಏಪ್ರಿಲ್‌ ಒಂದಕ್ಕೆ ತೆರೆಗೆ ಅಪ್ಪಳಿಸಲು ಸಜ್ಜಾಗಿದೆ. ಯೌಟ್ಯೂಬ್ ನಲ್ಲಿ ಈಗಾಗಲೇ ಟ್ರೈಲರ್ ಹಾಗೂ ಹಾಡುಗಳ ಮೂಲಕ ಹೆಚ್ಚು ನಿರೀಕ್ಷೆ ಮೂಡಿಸಿದೆ.. ತ್ರಿಕೋನ ಮುಂಬರುವ ಕನ್ನಡ ಚಿತ್ರ. ಹೌದು ಚಂದ್ರಕಾಂತ್ ನಿರ್ದೇಶನದ ಈ ಚಿತ್ರದಲ್ಲಿ ಸುರೇಶ್ ಹೆಬ್ಳೀಕರ್, ಲಕ್ಷ್ಮಿ, ಅಚ್ಯುತ್ ಕುಮಾರ್ ಮತ್ತು ಸುಧಾರಾಣಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ನಟ ಸಾಧು ಕೋಕಿಲ, ಮಂದೀಪ್ ರೈ ಮತ್ತು ರಾಕ್‌ಲೈನ್ ಸುಧಾಕರ್ ತ್ರಿಕೋನಕ್ಕಾಗಿ ಆಯ್ಕೆಯಾದ ಇತರ ಜನಪ್ರಿಯ ನಟರು ಸಹ ಈ ತ್ರಿಕೋನ ಸಿನಿಮಾದಲ್ಲಿ ಅಭಿನಯ ಮಾಡಿದ್ದಾರೆ.

ತ್ರಿಕೋನ ಸಿನಿಮಾದ ಹಾಡುಗಳ ಜಲಕ್ ಯೂಟ್ಯೂಬ್ ನಲ್ಲಿ ಈಗಾಗಲೇ ಸಕ್ಕತ್ ಸದ್ದು ಮಾಡುತ್ತಿವೆ. ಚಲ್ ಚಲ್ ಚುಲ ಎಂಬ ಲಿರಿಕಲ್ ಹಾಡು ಒಂದು ಮಿಲಿಯನ್ ವೀಕ್ಷಣೆ ಪಡೆದು ಮುನ್ನುಗ್ಗುತ್ತಿದೆ. ಒಂದು ವಿಭಿನ್ನವಾದ ಪ್ರಯತ್ನದಲ್ಲಿ ಸಿನಿಮಾ ಅಭಿಮಾನಿಗಳ ಎದುರು ತ್ರಿಕೋನವನ್ನ ಬಿಡುಗಡೆ ಮಾಡಲು ಚಿತ್ರತಂಡ ಎಲ್ಲಾ ತಯಾರಿ ನಡೆಸಿದೆ. ಹೌದು ಸಿನಿಮಾರಂಗದಲ್ಲಿ ಮೊಟ್ಟಮೊದಲ ಬಾರಿ ಟ್ರೈಲರ್ ಜೊತೆ ಸಾಂಗ್ ಮಿಕ್ಸ್ ಮಾಡಿಬಿಟ್ಟಿದ್ದಾರೆ. ಟ್ರೈಲರ್ ಇದೀಗ ಒಂದು ಮಿಲಿಯನ್ ವೀಕ್ಷಣೆ ಪಡೆದಿದ್ದು, ವಿಭಿನ್ನ ಪ್ರಯತ್ನದ ಛಾಯೆ ಈ ತ್ರಿಕೋನದಲ್ಲಿ ಎದ್ದು ಕಾಣುತ್ತಿದೆ. ಈ ಸಿನಿಮಾ ಒಂದು ಸಕತ್ ತ್ರಿಲ್ಲರ್ ಸಿನಿಮಾ ಆಗಿರಲಿದೆ. ಹಾಗೇ ನೋಡುಗರಿಗೆ ವಿಭಿನ್ನ ಹೊಸ ಅನುಭವ ನೀಡುವುದಂತೂ ಗ್ಯಾರಂಟಿ.

ಚಿತ್ರತಂಡ ಇದೇ ಏಪ್ರಿಲ್ ಒಂದನೇ ತಾರೀಕು ರಾಜ್ಯಾದ್ಯಂತ ಸಿನಿಮಾ ಬಿಡುಗಡೆಗಾಗಿ ತಯಾರಿ ನಡೆಸಿದ್ದು, ಸಿನಿಮಾದ ಪೋಸ್ಟರ್ ಹಾಡುಗಳು ಎಲ್ಲರನ್ನ ಥಿಯೇಟರ್ ಬಳಿ ಪಕ್ಕಾ ಕರೆ ತರುತ್ತಿವೆ. ಹೌದು ಪ್ರೇಕ್ಷಕರು ಕೂಡ ಈ ಸಿನಿಮಾವನ್ನು ತೆರೆಯ ಮೇಲೆ ನೋಡಲು ತುಂಬಾ ಕಾತುರರಾಗಿದ್ದಾರೆ ಎಂದು ಹೇಳಲಾಗುತ್ತಿದೆ. ತ್ರಿಕೋನ ಚಿತ್ರದಲಿ ಒಬ್ಬ ಮನುಷ್ಯ  ಜೀವನದಲ್ಲಿ ಎಂಥಹ ಸಮಸ್ಯೆಗಳನ್ನ ಎದುರಿಸುತ್ತಾನೆ. ಹೇಗೆ ಅಹಂ ಕೋಪ ತಾಳ್ಮೆ ನಡುವೆ ಸಿಕ್ಕಿ ಒದ್ದಾಡುತ್ತಾನೆ ಎಂದು ತೋರಿಸಿದ್ದು, ಅದರಿಂದ ನಾವು ಹೊರ ಬರುವುದು ಹೇಗೆ ಎಂಬುದಾಗಿಯೂ ತೋರಿಸಲಾಗಿದೆ. ತ್ರಿಕೋನ ಚಿತ್ರತಂಡಕ್ಕೆ ಒಳ್ಳೆಯದು ಆಗಲಿ ಎಂದು ನೀವು ಶುಭಕೋರಿ. ಹಾಗೆ ಎಲ್ಲಾರೂ ತಪ್ಪದೆ ಏಪ್ರಿಲ್ ಒಂದನೆ ತಾರಿಕಿಗೆ ಥಿಯೇಟರ್ಗೆ ಹೋಗಿಯೇ ಸಿನಿಮಾ ನೋಡಿ...

ಪ್ಯಾನ್ ಇಂಡಿಯಾ ಕಬ್ಜದಲ್ಲಿ ಮಧುಮತಿ ಪಾತ್ರಕ್ಕೆ ಬಣ್ಣ ಹಚ್ಚಿದ ನಟಿ ಶ್ರೀಯಾ..! ಹೇಗಿದೆ ಫಸ್ಟ್ ಲುಕ್..?

ವರ್ಷದ ಬಹು ನಿರೀಕ್ಷಿತ ಸ್ಯಾಂಡಲ್‌ವುಡ್ ಚಿತ್ರಗಳಲ್ಲಿ ಒಂದಾದ ಕಬ್ಜಾದಲ್ಲಿ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ ಎಂದು ನಟಿ ಶ್ರಿಯಾ ಸರನ್ ಮಾರ್ಚ್ 7 ರಂದು ಅವರ ಅಭಿಮಾನಿಗಳ ಮುಂದೆ ಭಾನುವಾರ ಘೋಷಿಸಿದರು. ಅಭಿಮಾನಿಗಳೊಂದಿಗೆ ಪ್ರಕಟಣೆಯನ್ನು ಹಂಚಿಕೊಂಡ ಶ್ರೀಯಾ ಹೀಗೆ ಬರೆದಿದ್ದಾರೆ: “ಕಬ್ಜಾ 1970 ರ ದಶಕದಲ್ಲಿ ನಡೆದ ಆಕ್ಷನ್ ಚಲನಚಿತ್ರವಾಗಿದೆ. ಈ ಚಲನಚಿತ್ರವು ಭಾರತದ ಇತಿಹಾಸದಲ್ಲಿ ಇದುವರೆಗೆ ಬಹಿರಂಗಪಡಿಸದ ಕ್ರೂರ ದರೋಡೆಕೋರನ ಪ್ರಯಾಣವನ್ನು ಚಿತ್ರಿಸುತ್ತದೆ. ನನಗೂ ಅದರ ಬಗ್ಗೆ ತಿಳಿಯುವ ಕುತೂಹಲವಿದೆ.. ಅಲ್ಲವೇ?”  ತಮ್ಮ ಕೃತಜ್ಞತೆಯನ್ನು ವ್ಯಕ್ತಪಡಿಸುತ್ತಾ, ಶ್ರೀಯಾ ಬರೆದಿದ್ದಾರೆ...

ಹೌದು ಕಬ್ಜ ಚಿತ್ರವನ್ನು ನಿರ್ದೇಶಕ ಆರ್ ಚಂದ್ರು ಅವರು ನಿರ್ದೇಶನ ಮಾಡಿದ್ದಾರೆ. ಹಾಗೇನೇ ರವಿ ಬಸ್ರುರು ಅವರು ಸಿನಿಮಾಗೆ ಮ್ಯೂಸಿಕ್ ನೀಡಿದ್ದಾರೆ. ಪ್ಯಾನ್ ಇಂಡಿಯಾ ಕಬ್ಜ ಈಗಾಗಲೇ ಕುತೂಹಲ ಮೂಡಿಸಿದ್ದು ಯಾವಾಗ ಸಿನಿಮಾ ಬಿಡುಗಡೆ ಆಗುತ್ತದೆಂದು ಅಭಿಮಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ. ಇಂಡಿಯಾದ ಖ್ಯಾತ ನಿರ್ದೇಶಕ ಹಾಗೂ ನಟ ಸೂಪರ್ ಸ್ಟಾರ್ ಉಪೇಂದ್ರ ಅವರ ಅಭಿನಯದ ಈ ಕಬ್ಜ ಸಿನಿಮಾದಲ್ಲಿ ಸ್ಯಾಂಡಲ್ವುಡ್ ನ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಹಾಗೂ ಸೌತ್ ಸಿನಿ ರಂಗದ ಇನ್ನೂ ಖ್ಯಾತ ಸ್ಟಾರ್ ನಟರುಗಳ ತಾರಾ ಬಳಗವಿದೆ. ನಟಿ ಕಾಜಲ್ ಅಗರ್ವಾಲ್, ಶ್ರೀಯಾ, ನಯನತಾರ ಅವರು ಸಹ ನಟನೆ ಮಾಡಿದ್ದಾರೆ ಎಂದು ತಿಳಿದುಬಂದಿದೆ.

ಹೌದು ಕಬ್ಜ ಸಿನಿಮಾದಲ್ಲಿ ನಟಿ ಶ್ರೀಯಾ ಸರನ್ ಅವರು ಕೂಡ ಅಭಿನಯಿಸುತ್ತಿದ್ದು, ಶ್ರೇಯಾ ಅವರ ಮಧುಮತಿ ಪಾತ್ರದ ಹೊಸ ಪೋಸ್ಟರ್ ಮೊನ್ನೆ ಬಿಡುಗಡೆಯಾಯಿತು. ಪ್ಯಾನ್ ಇಂಡಿಯಾ ಕಬ್ಜಾ ಸಿನಿಮಾ ಅತಿ ದೊಡ್ಡ ಬಜೆಟ್ ಸಿನಿಮಾವಾಗಿ ಮೂಡಿ ಬರಲಿದೆ. ಕೆಜಿಎಫ್ ಬಳಿಕ ಇದು ಅತಿ ದೊಡ್ಡ ಹೈಪ್ ಕ್ರಿಯೇಟ್ ಮಾಡುತ್ತದೆ ಎಂದು ಸಿನಿ ತಜ್ಞರು ಹೇಳುತ್ತಿದ್ದಾರೆ. ಹೌದು ಈ ಖುಷಿ ವಿಚಾರವನ್ನು ನಟಿ ಶ್ರೀಯಾ ಸರನ್ ಅವರು ಹೇಳಿಕೊಂಡಿದ್ದು ಜೊತೆಗೆ ಅವರ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಅವರು ಅವರ ಪಾತ್ರದ ಬಗ್ಗೆ ಹೇಳಿಕೊಂಡಿದ್ದಾರೆ. ಹಾಗೆ ಖ್ಯಾತ ಕನ್ನಡ ನಟರುಗಳಾದ ಕಿಚ್ಚ ಸುದೀಪ್ ಹಾಗೂ ಉಪೇಂದ್ರ ಅವರ ಜೊತೆ ಅಭಿನಯ ಮಾಡಲು ತುಂಬಾ ಖುಷಿಯಾಗುತ್ತಿದೆ ಎಂದು ಇನ್ಸ್ಟಾದಲಿ ಬರೆದುಕೊಂಡಿದ್ದಾರೆ. ಹೌದು ಈ ನಟರೊಂದಿಗೆ ಕೆಲಸ ಮಾಡಲು ತುಂಬಾ ಸಂತೋಷವಾಗಿದೆ….  ಇದೊಂದು ಅದ್ಭುತ ಚಿತ್ರವಾಗಲಿದೆ. ” ಎಂದಿದ್ದಾರೆ ನಟಿ ಶ್ರೀಯಾ...

ನೇತ್ರಂ ಮೋಷನ್ ಪೋಸ್ಟರ್ ಬಿಡುಗಡೆಯಾದ ಬೆನ್ನಲ್ಲೇ ಅಭಿಮಾನಿಗಳಿಂದ ಮೆಚ್ಚುಗೆ..!! ವಿಡಿಯೋ ;

ಹೊಸಬರ ಸಿನಿಮಾಗಳು ಕನ್ನಡ ಸಿನಿಮಾರಂಗದಲ್ಲಿ ಹೆಚ್ಚು ಈಗೀಗ ಹೊರಗಡೆ ಬರುತ್ತಿವೆ. ಅವರದೇ ಆದ ವಿಭಿನ್ನ ಅಭಿನಯದ ಮೂಲಕ ಹಾಗೂ ವಿಭಿನ್ನ ಕಥಾಹಂದರ ಮೂಲಕ ಪ್ರೇಕ್ಷಕರನ್ನು ರಂಜಿಸುವಲ್ಲಿ ಹೊಸ ಪ್ರಯತ್ನದ ಮೂಲಕ ಸಿನಿಮಾ ಮಾಡೋಣ ಎಂದು ಬರುತ್ತಿದ್ದಾರೆ. ಹಾಗೆ ಮುಂದೆ ಬಂದ ಕಲಾವಿದರು ಯಶಸ್ವಿಯಾಗಿದ್ದಾರೆ ಕೂಡ. ಹೌದು ರೈಸಿಂಗ್ ಸ್ಟಾರ್ ದಕ್ಷ್ ಯುವ ನಾಯಕ ನಟ ನೇತ್ರಂ ಎನ್ನುವ ಚಿತ್ರದಲ್ಲಿ ಅಭಿನಯ ಮಾಡುತ್ತಿದ್ದು, ಈ ನೇತ್ರಂ ಎನ್ನುವ ಸಿನಿಮಾವನ್ನು ಬಿಲ್ಲೂರ್ ಸುರೇಶ್ ಅವರು ನಿರ್ಮಾಣ ಮಾಡುತ್ತಿದ್ದು, ಜೊತೆಗೆ ಸಿನಿಮಾ ನಿರ್ದೇಶಕರು ಕೂಡ ಇವರೇ ಆಗಿದ್ದಾರೆ. 

ಇತ್ತೀಚಿನ ದಿನಗಳಲ್ಲಿ ಕಳೆದ ಎರಡು ವರ್ಷಗಳಿಂದ ಕರೋನ ಬೆನ್ನೆಲ್ಲೆ ಕನ್ನಡ ಸಿನಿಮಾರಂಗವೂ ಕೂಡ ಹೆಚ್ಚು ಸಮಸ್ಯೆ ಎದುರಿಸಿತ್ತು. ಲಾಕ್ಡೌನ್ ಸಮಸ್ಯೆ ಎದುರಿಸಿದ ವೇಳೆಯೇ ಕೆಲ ಯುವಕಲಾವಿದರು, ಯುವ ನಟರು ಹೊಸ ತಂಡಗಳ ಮೂಲಕವೆ ಓಟಿಟಿ ವೇದಿಕೆಯಲ್ಲಿ ಅವರ ಸಿನಿಮಾಗಳನ್ನ ಬಿಡುಗಡೆ ಮಾಡಿ ಯಶಸ್ವಿಯಾದರು. ಹೌದು ಇದೀಗ ನೇತ್ರಂ ಎನ್ನುವ ಹೊಸ ಚಿತ್ರತಂಡ ಈಗಾಗಲೇ ಭರ್ಜರಿ ತಯಾರಿ ನಡೆಸಿದೆ. ಇತ್ತೀಚಿಗಷ್ಟೇ ಚಿತ್ರತಂಡ ಚಿತ್ರದ ಮುಹೂರ್ತ ಕಾರ್ಯ ನೆರವೇರಿಸಿದ್ದು ಚಿತ್ರದ ಮೋಷನ್ ಪೋಸ್ಟರ್ ಬಿಡುಗಡೆ ಮಾಡಿದ್ದಾರೆ. ಬಿಡುಗಡೆಯಾದ ಬೆನ್ನಲ್ಲೇ ನೆತ್ರಂ ಚಿತ್ರದ ಮೋಷನ್ ಪೋಸ್ಟರ್ ವಿಡಿಯೋ ಇದೀಗ ಹೆಚ್ಚು ಪ್ರೇಕ್ಷಕರನ್ನು ತನ್ನತ್ತ ಸೆಳೆಯುತ್ತಿದೆ. ಸಿನಿಮಾ ಶೂಟಿಂಗ್ ಈಗಾಗಲೇ ಆರಂಭವಾಗಿದೆ. ನಾಯಕನಟ ರೈಸಿಂಗ್ ಸ್ಟಾರ್ ದಕ್ಷ್ ಅವರು ಅದ್ಭುತವಾಗಿ ಮೋಷನ್ ಪೋಸ್ಟರ್ ಅಲ್ಲಿ ಕಾಣಿಸಿಕೊಂಡಿದ್ದಾರೆ.

ಈ ನೇತ್ರಂ ಸಿನಿಮಾಕ್ಕೆ ಬಿಲ್ಲೂರ್ ಸುರೇಶ್ ಅವರೇ ಆಕ್ಷನ್ ಕಟ್ ಹೇಳುತ್ತಿದ್ದಾರೆ. ಜೊತೆಗೆ ಸಿನಿಮಾ ನಿರ್ಮಾಪಕರಾಗಿ  ಬಿಲ್ಲೂರ್ ನರೇಶ್ ಅವರೇ ನಿರ್ಮಾಣ ಮಾಡುತ್ತಿದ್ದಾರೆ. ಜೊತೆಗೆ ಸಹ ನಿರ್ಮಾಪಕರಾಗಿ ಮೊಕ್ತುಮ್ ಪಟೇಲ್, ಶೇಕ್ ಸಬೀರ್ ಅಬ್ಬು ಅವರು ಕಾರ್ಯ ನಿರ್ವಹಿಸಿದ್ದಾರೆ. ಹಾಗೆ ಶೀಲಾ ಹಾಗೂ ಮುದಾಸೀರ್ ಅವರು ನೇತ್ರಂ ಸಿನಿಮಾದಲ್ಲಿ ಇದ್ದಾರೆ ಎಂದು ಹೇಳಲಾಗಿದೆ. ಈ ಹೊಸಬರ ತಂಡಕ್ಕೆ ಶುಭಾಶಯ ತಿಳಿಸಿ, ಹಾಗೆ ಇದೀಗ ನೇತ್ರಂ ಚಿತ್ರದ ಶೂಟಿಂಗ್ ಮುಕ್ತಾಯ ಆಗಿದ್ದು, ಪೋಸ್ಟ್ ಪ್ರೊಡಕ್ಷನ್ ನಡೀತಾ ಇದೆ. ನೇತ್ರಂ ಚಿತ್ರದ ಮೋಷನ್ ಪೋಸ್ಟರ್ ವಿಡೀಯೋ ನೋಡಿ....#Nethramkannadamovie #Nethram #RisingstarDaksh #Daksh

ಕಬ್ಜ ಸೆಟ್ ಗೆ ಭಾರ್ಗವ್ ಬಕ್ಷಿಯಾದ ಕಿಚ್ಚನ ಎಂಟ್ರಿ..! ಸುದೀಪ್ ಭಾಗದ ಚಿತ್ರೀಕರಣ ಪ್ರಾರಂಭ..!

ಕನ್ನಡ ಸಿನಿಮಾರಂಗದಲ್ಲಿ ದೊಟ್ಟ ಮಟ್ಟದ ಮಲ್ಟಿ ಸ್ಟಾರ್ ಸಿನಿಮಾ ಆಗಿ ಕಬ್ಜ ಸಿನಿಮಾ ಸದ್ದು ಮಾಡುತ್ತಿದೆ.. ಈ ಕಬ್ಜ ಎಲ್ಲಾ ಭಾಷೆಗಳಲ್ಲೂ ಸಕ್ಕತ್ ಸೌಂಡ್ ಮಾಡುವ ಚಿತ್ರ ಆಗಲಿದೆ. ಕೆಜಿಎಫ್ ಬಳಿಕ ಇಡೀ ಭಾರತ ಚಿತ್ರರಂಗವೇ ಹೆಚ್ಚು ನೀರಿಕ್ಷೆ ಇಟ್ಟುಕೊಂಡಿರುವ ಕಬ್ಜ ಚಿತ್ರಕ್ಕೆ ಇದೀಗ ನಟ ಕಿಚ್ಚ ಅವರು ಆಗಮಿಸಿದ್ದಾರೆ. ಹಾಗೆ ಕಿಚ್ಚ ಸುದೀಪ್ ಅವರ ಭಾಗದ ಕಬ್ಜ ಸಿನಿಮಾದಲ್ಲಿಯ ಚಿತ್ರಿಕರಣ ಆರಂಭವಾಗಿದೆ. ಹೌದು ಇದೀಗ ನಟ ಕಿಚ್ಚ ಸುದೀಪ್ ಅವರ ಚಿತ್ರೀಕರಣದ ಭಾಗಕ್ಕೆ ಬೇಕಾಗಿರುವ ಎಲ್ಲಾ ಸೆಟ್ ಅನ್ನು ಕಬ್ಜ ಚಿತ್ರತಂಡ ನಿರ್ಮಾಣ ಮಾಡಿ ಚಿತ್ರಿಕರಣ ಮಾಡುತ್ತಿದೆ. 

ಹೌದು ನಟ ಉಪೇಂದ್ರ ಹಾಗೂ ನಟ ಕಿಚ್ಚ ಸುದೀಪ್ ಅವರು ಈಗಾಗಲೇ ಈ ಮುಂಚೆಯೇ ಒಟ್ಟಿಗೆ ಅಭಿನಯ ಮಾಡಿದ್ದು ಇದು ಎರಡನೇ ಬಾರಿ ಮತ್ತೆ ತೆರೆಯ ಮೇಲೆ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಮೊದಲು ಮುಕುಂದ ಮುರಾರಿ ಎಂಬ ಸಿನಿಮಾದಲ್ಲಿ ಇವರಿಬ್ಬರೂ ಒಟ್ಟಿಗೆ ಅಭಿನಯಿಸಿ ತೆರೆಯ ಮೇಲೆ ಕಾಣಿಸಿಕೊಂಡಿದ್ದರು. ಇದೀಗ ಮತ್ತೊಮ್ಮೆ ಒಟ್ಟಿಗೆ ಕಬ್ಜದಲ್ಲಿ ಅಭಿನಯ ಮಾಡಿದ್ದಾರೆ.. ನಿರ್ದೇಶಕ ಆರ್ ಚಂದ್ರು ಅವರೆ ಈ ಕಬ್ಜ ಸಿನಿಮಾವನ್ನ ನಿರ್ಮಿಸುತ್ತಿದ್ದಾರೆ. ಹಾಗೆ ಚಿತ್ರಕ್ಕೆ ಕೆ.ಜಿ.ಎಫ್ ಖ್ಯಾತಿ ರವಿ ಬಸ್ರೂರು ಅವರು ಸಂಗೀತ ನಿರ್ದೇಶನ ಮಾಡಿದ್ದಾರೆ ಎಂದು ಹೇಳಲಾಗಿದೆ.

ಹೌದು ಕಾರ್ಯಕಾರಿ ನಿರ್ಮಾಪಕರಾಗಿ ಮುನೀಂದ್ರ ಅವರು ಕಾರ್ಯ ನಿರ್ವಹಿಸುತ್ತಿದ್ದಾರೆ. ಹಾಗೆ ಲೈನ್ ಪ್ರೊಡ್ಯೂಸರ್ ಆಗಿ ರಾಜಶೇಖರ್ ಅವರು ಕಾರ್ಯನಿರ್ವಹಿಸುತ್ತಿದ್ದಾರೆ. ಎ.ಜೆ.ಶೆಟ್ಟಿ ಅವರ ಛಾಯಾಗ್ರಹಣ, ಮಹೇಶ್ ಸಂಕಲನ, ರಾಜು ಸುಂದರಂ, ಗಣೇಶ್, ಶೇಖರ್ ನೃತ್ಯ ನಿರ್ದೇಶನ ಹಾಗೂ ರವಿವರ್ಮ, ವಿಕ್ರಂಮೋರ್,ವಿಜಯ್ ಸಾಹಸ ನಿರ್ದೇಶನವಿರುವ ಈ ಕಬ್ಜ ಚಿತ್ರದ ತಾರಾಬಳಗದಲ್ಲಿ ನಟ ಉಪೇಂದ್ರ, ಸುದೀಪ್, ಕಾಮರಾಜನ್(ಐ ಮೂವಿ ಖ್ಯಾತಿ), ಟಾಲಿವುಡ್ ನಟ ಜಗಪತಿ ಬಾಬು, ಹಾಗೆ ರಾಹುಲ್ ಜಗತಪ್,ಅನೂಪ್ ರೇವಣ್ಣ, ಜಾನ್ ಕೊಕ್ಕಿನ್, ರಾಹುಲ್ ದೇವ್, ನವೀನ್, ಕೋಟ ಶ್ರೀನಿವಾಸ್, ಜಯಪ್ರಕಾಶ್, ಕಾಟ್ ರಾಜು, ಸುಬ್ಬರಾಜು ಮುಂತಾದವರಿದ್ದಾರೆ ಎಂದು ತಿಳಿದುಬಂದಿದೆ.

ಪ್ರತಿಯೊಂದು ಅಪ್ಡೇಟ್ ನಲ್ಲೂ ಹೆಚ್ಚು ಸುದ್ದಿ ಮಾಡುತ್ತಿದೆ ಈ ಕಬ್ಜ. ಹಾಗೆ ಈ ಕಬ್ಜ ಚಿತ್ರ ನಮ್ಮ ಹೆಮ್ಮೆಯ ಕನ್ನಡ ಚಿತ್ರವಾಗಿದೆ. ಈ ಚಿತ್ರ ಕೂಡ ನಮ್ಮ ಕನ್ನಡ ಸಿನಿಮಾರಂಗದ ಹೆಸರನ್ನು ಅತಿ ದೊಡ್ಡ ಮಟ್ಟಕ್ಕೆ ಕರೆದೊಯ್ಯಲಿ ಹಾಗೆ ನಮ್ಮ ಕನ್ನಡ ಇಂಡಸ್ಟ್ರಿಯ ಹೆಸರನ್ನ ಬೆಳಸಲಿ ಎಂಬುದೇ ನಮ್ಮ ಸಿನಿರಸಿಕರ ಆಶಯ....